ՀՀ մշակույթի նախարարության աջակցությամբ Ալեքսանդր Սպենդիարյանի անվան օպերայի ու բալետի ազգային ակադեմիական թատրոնում մարտի 29-ին կայացավ Ն. Ս. Նադեժդինայի անվան պարարվեստի պետական ակադեմիական «Բերյոզկա» անսամբլի համերգը: Հայաստանյան բեմում «Բերյոզկան» ներկայացրեց այն ստեղծագործությունները, որոնց հանդիսատեսը մշտապես մեծ խանդավառությամբ է սպասում:
Արդեն գրեթե յոթ տասնամյակ «Բերյոզկան» ներկայացնում է ռուսական ժողովրդական պարերը: Անսամբլի տնօրեն Սերգեյ Ազովսկին, որի հայրը հայ է, նշեց, որ իրենք շատ երկար ժամանակ են սպասել այս հանդիպմանը, քանի որ մշտապես իմացել են, որ հայ հանդիսատեսը շատ նրբանկատորեն է զգում մշակույթը: ՀՀ մշակույթի նախարար Արմեն Ամիրյանը՝ շնորհավորելով անսամբլի արտիստներին փառահեղ ելույթի համար, հույս հայտնեց, որ նրանք առաջիկայում նույնպես Հայաստան կվերադառնան և իրենց շքեղ պարարվեստը հայաստանյան հանդիսատեսին ներկայացնելու ցանկություն կունենան:
«Բերյոզկա» անսամբլը մարտի 30-ին ևս մեկ համերգով հանդես կգա Օպերայի և բալետի ազգային ակադեմիական թատրոնում, այնուհետև նախատեսված են հյուրախաղեր Լատինական Ամերիկայում:
Անսամբլի գեղարվեստական ղեկավարն ու գլխավոր բալետմայստերը ԽՍՀՄ ժողովրդական արտիստ Միրա Կոլցովան է: