Իրադարձություններ

     Ապրիլյան պատերազմի օրերին շփման գծում հակառակորդի կրակոցներից զոհված Աղասի Ասատրյանն այսօր կդառնար 21 տարեկան։ «Աղասին բարի էր, ընկերասեր, նվիրված ու շատ հավասարակշռված: Աշխույժ, ուրախ տղա էր, շատ էր սիրում կյանքը…»,- իր հարցազրույցներից մեկում ասել է մերօրյա հերոսի մայրը՝ Նարինե Ասատրյանը: Մոր խոսքով՝ որդին ծառայությունից գրեթե ոչինչ չի պատմել, երբեք չի բողոքել, ամեն անգամ, երբ մայրը հարցել է՝ «ոնց ես», միշտ պատասխանել է. «Ծառայում եմ Հայաստանի Հանրապետությանը: Այնքան հպարտությամբ էր ասում…»։ Ավելի վաղ տեղեկացրել էինք, որ Աղասի Ասատրյանը Մասիս քաղաքից է։ Նա բանակ էր զորակոչվել 2015 թվականի աշնանը: Վերջինը տան միակ որդին էր, ունի երկու քույր, սովորել է Մասիսի պետական գյուղատնտեսական քոլեջում: Ծառայության անցել Արցախում` Թալիշում: Ծառայել է որպես հետախույզ-դիպուկահար՝ ավագ-լեյտենանտ Մերուժան Ստեփանյանի դասակում: Մասիսի դպրոցի դասասենյակներից մեկն անվանակոչվել է քառօրյա պատերազմի հերոսի՝ Աղասի Ասատրյանի անունով, բացի այդ, Մասիս քաղաքում մի փողոց կրում է նրա անունը: