Աֆղանստանում ձնահյուսքի, բքի ու սաստիկ սառնամանիքի հետևանքով 106 մարդ է զոհվել: Հաղորդվում է 10-յակ վիրավորների մասին:
Նուրիստան նահանգում 2 գյուղ ամբողջովին թաղվել է ձյան տակ: Խիստ տուժել է նաև Բադահշան նահանգը:
Աֆղանստանի գլխավոր միջազգային օդանավակայանը թռիչքուղու վրա առկա ձյան և մերկասառույցի պատճառով փակ է: Մայրաքաղաք Քաբուլը Կանդագար քաղաքին կապող առանցքային նշանակության մայրուղին ևս փակ է, այնտեղ 250 ավտոմեքենա կա արգելափակված: Փակ է նաև երկրի գլխավոր մայրուղին, որ հյուսիսային շրջանները կապում է մայրաքաղաքի հետ:
Սաստիկ ցրտեր են նաև Աֆղանստանին սահմանակից Պակիստանում: Այնտեղ առնվազն 14 մարդ է զոհվել, որոնցից 9-ը` Չիթրալ նահանգում: Այստեղ ձնահյուսքի հետևանքով ավերվել են 10-յակ տներ, բազմաթիվ մարդիկ մնացել են անտուն:
Ըստ օդերևութաբանների`վատ եղանակը կշարունակվի ևս մի քանի օր: