ՄԱԿ-ի գլխավոր քարտուղար Անտոնիո Գուտերեշը հայտարարել է, որ Զապորոժյեի ատոմակայանի հնարավոր վնասումն «ինքնասպանություն» կլինի: Այս մասին, ըստ CNN-ի, նա ասել է հինգշաբթի Լվովում նախագահ Վլադիմիր Զելենսկու հետ հանդիպումից հետո։
Գուտերեշը կոչ է արել «ապառազմականացնել» ատոմակայանի շրջակայքը և ասել, որ շտապ անհրաժեշտ է համաձայնություն՝ «կայանը որպես զուտ քաղաքացիական ենթակառուցվածք վերականգնելու և տարածաշրջանի անվտանգությունն ապահովելու համար»:
«ՄԱԳԱՏԷ-ի (Ատոմային էներգիայի միջազգային գործակալության) հետ սերտ կապի մեջ գտնվող ՄԱԿ-ի քարտուղարությունը գնահատել է, որ մենք Ուկրաինայում ունենք նյութատեխնիկական և անվտանգության հնարավորություններ՝ աջակցելու ՄԱԳԱՏԷ-ի ցանկացած առաքելության Զապորոժյեի ատոմակայանում, եթե Ռուսաստանը և Ուկրաինան համաձայնեն»,- ասել է նա:
Գլխավոր քարտուղարի խոսքով՝ պետք է ամեն ինչ արվի, որպեսզի ատոմակայանի օբյեկտները կամ տարածքը ռազմական գործողությունների օբյեկտ չլինեն։
«Ռազմական տեխնիկան և անձնակազմը պետք է դուրս բերվեն ատոմակայանից: Պետք է խուսափել տեղում ուժերի կամ սարքավորումների հետագա տեղակայումից: Տարածքը պետք է ապառազմականացվի»,- ասել է Գուտերեշը: