Գլխավոր դատախազը՝ Գևորգ Կոստանյանի, Միհրան Պողոսյանի ու Վահագն Հարությունյանի մասին
 ՀՀ գլխավոր դատախազ Արթուր Դավթյանը, լրագրողների հետ ճեպազրույցում պատասխանելով հարցին՝ հույս ունե՞ք, որ նախկին գլխավոր դատախազ Գևորգ Կոստանյանը կձերբակալվի ու կկալանավորվի, ասել է. «Մեր գործը հույս ունենալով չի, կան սահմանված ընթացակարգեր: Գիտեք՝ յուրաքանչյուր երկիր ինքն է որոշումներ կայացնում, թեև այդ սուվերենությունը լիարժեք անսահմանափակ չէ... Ոչ, կապ չեմ հաստատել Կոստանյանի հետ, որքան գիտեմ՝ քննիչն է կապ հաստատել»: Մարտի 1-ի գործով մեղադրյալ, Մարտի 1-ի գործով քննչական խմբի նախկին ղեկավար Վահագն Հարությունյանի պաշտպանը դիմել է գլխավոր դատախազին՝ խնդրելով վերացնել տեխնիկական խնդիրները՝ մասնավորապես հետախուզումը, որպեսզի Հարությունյանը հնարավորություն ունենա վերադառնալ Հայաստան: Լրագրողները հետաքրքրվել են՝ քննարկե՞լ են հարցը. «Դեռևս չենք քննարկել»,- ասել է գլխավոր դատախազը: «Միհրան Պողոսյանի խափանման միջոցը նոր չի, որ վերացվել է, բայց էդ առումով շարունակում ենք քննարկումները մեր ռուս գործընկերների հետ: Չեմ բացառում, որ նոր, առավել ծանր հանցագործությունների դրվագներ ունենանք ու, հանցանքի ծանրությամբ պայմանավորված, հույս ունենք, որ մեր գործընկերներն իրավական ու արդարացի մոտեցում կցուցաբերեն»,- անդրադառնալով ԴԱՀԿ նախկին պետ Միհրան Պողոսյանի նկատմամբ Ռուսաստանում ընտրված խափանման միջոցի վերացմանը, ասել է Արթուր Դավթյանը: Հարցին՝ հիմա բավարա՞ր ծանր չէ, որ ՌԴ-ն արտահանձնի, նշել է. «Ծանր հանցագործություն է, իսկ բավարար է, թե ոչ, դրա մասին ասել ենք: Քրգործի քննությունն ակտիվ շարունակվում է, նոր դրվագների դեպքում, մեր գործընկերների հետ շփումները շարունակելու ենք»: |
