Իսպանիայի Գերագույն դատարանը Կատալոնիայի խորհրդարանի խոսնակ Կարմե Ֆորկադելին ձերբակալելու մասին որոշում է ընդունել, հաղորդում է El Mundo պարբերականը:
Նրան ազատ կարձակեն 150 հազար եվրոյի չափով գրավի դիմաց:
Խորհրդարանի մյուս նախկին անդամները՝ Լուիս Կորոմինասը, Լուիս Գինոն, Աննա Սիմոն, Ռամոնա Բարուֆեթը մեկ շաբաթվա ընթացքում պետք է 25 հազար եվրոյի չափով գրավ վճարեն և դեռևս կարող են ազատության մեջ մնալ:
Գրավի վճարման դեպքում Ֆորկադելն ու մյուս նախկին պատգամավորները պետք է ամեն շաբաթ ներկայանան դատարան և իրավունք չունեն դուրս գալ երկրից:
Նշենք, որ Կատալոնիայի նախկին ղեկավարությունը մեղադրվում է ապստամբության, պետական համակարգը փոխելու կոչերի և պետական միջոցները վատնելու համար: Ըստ իսպանական օրենսդրության՝ ապստամբություն կազմակերպելու համար նրանց մինչև 30 տարվա ազատազրկում է սպառնում:
Ավելի վաղ պայմանով ազատ էր արձակվել ինքնավարություն հռչակած Կատալոնիայի նախկին ղեկավար Կառլես Պուչդեմոնը: