Իրաքյան Քրդստանի ընդդիմությունը կոչ է արել տարածաշրջանի առաջնորդ Մասուդ Բարզանիին հրաժարական տալ, հաղորդում է Al Arabiya-ն:
Ընդդիմադիր «Գորան» կուսակցությունը, որը Իրաքի Քրդստանի խորհրդարանում զբաղեցնում է 111 տեղերից 24-ը, հայտարարել է, որ Բարզանին և նրա տեղակալ Քոսրաթ Ռասուլը պետք է հրաժարական տան:
«Քրդական տարածաշրջանի նախագահն ու նրա տեղակալն այլևս ոչ մի օրինականություն չունեն և պետք է հրաժարական տան»,- ասվում է ընդդիմության հայտարարության մեջ:
Ընդդիմությունը կոչ է արել «փրկության ազգային կառավարություն» ստեղծել՝ Բաղդադի հետ երկխոսության և նոր ընտրություններ անցկացնելու համար:
Հիշեցնենք, որ սեպտեմբերի 25-ին Իրաքի քրդերը ճնշող մեծամասնությամբ կողմ են քվեարկել տարածաշրջանի անկախությանը: