ՌԴ նախագահի մամուլի խոսնակ Դմիտրի Պեսկովը մեկնաբանել է Գերմանիայի կանցլեր Անգելա Մերկելի` Թուրքիայում Ռուսաստանի հասցեին արած հայտարարությունը, որում կանցլերը ՌԴ-ին մեղադրել էր հազարավոր սիրիացիների տառապանքներին մասնակցելու համար:
RBC-ի փոխանցմամբ` այդ հայտարարությանն ի պատասխան Պեսկովը նշել է. «Ինչ վերաբերում է Գերմանիայի կանցլերի խոսքերին, թե Ռուսաստանի ռազմաօդային ուժերի հարվածներից մարդկային զոհեր են լինում, ապա, անշուշտ այստեղ պետք է ուշադրություն դարձնել նրան, որ չնայած նմանաբովանդակ հայտարարությունների մեծ քանակին` այդ խոսքերն ապացուցող ոչ մի փաստարկ չի ներկայացվել, որ վստահության արժանի լինի: Մենք, իհարկե, ևս մեկ անգամ հորդորում ենք մեծ ուշադրությամբ ու պատասխանատվությամբ կիրառել նման ձևակերպումներ` Սիրիայի` առանց այն էլ խոցելի իրադրության մասին»: