«Երեսուն տարի առաջ Ազատության հրապարակը ցնցեց ամբողջ աշխարհը: Այս հրապարակում սկսվեց շարժում, որն սկիզբ դրեց սովետական իմպերիայի քայքայմանը, խարխլեց այդ կայսրության հիմքերը, խարխլեց նաև սոցիալիստական լագերի՝ Արևելյան Եվրոպայի երկրի հիմքը: Ղարաբաղյան ազատագրական շարժումն առաջնեկն էր ամբողջ այդ ազատական շարժումների: Այդ շարժումը ոչ միայն առաջինն էր իր սկզբով, այլ առաջինն էր իր մոբիլիզացիայով, իր կազմակերպվածությամբ, իր հումանիզմով, իր երկարակեցությամբ և առաջինն էր իր արդյունքով»,-այսօր, Ազատության հրապարակում Ղարաբաղյան շարժման 30-ամյակին նվիրված հանրահավաքի իր ելույթում ասաց ՀԱԿ անդամ Արամ Մանուկյանը:
Նա նշեց, որ «այս իշխանությունների հիմնական գործն ըմբոստ, հերոս մարդկանց երկրից քշելն էր, ինչը, փաստորեն, նրանց մոտ լավ էլ ստացվել է»:
Նշենք, որ տոնական հանրահավաքին նախատեսվում է պատմաբան Աշոտ Սարգսյանի՝ «Ղարաբաղյան շարժման պատմություն. 1988-1989» պատմագիտական աշխատության շնորհանդեսը։
Շարժմանը նվիրված նյութերի ցուցադրությունը կշարունակվի նաև փետրվարի 21-ին և 22-ին։