Հետաքրքիր է

Հայտնի լուսանկարիչ Օմար Ռեդան ոտքի տակ է տվել աշխարհի կեսն ու անմահացրել այնպիսի ցեղերի ներկայացուցիչների, որոնք գրեթե չեն հաղորդակցվում քաղաքակիրթ աշխարհի հետ, պահպանում են իրենց նախնիների ավանդույթներն, ու ցավոք, դանդաղ մահանում են:

Թհարուն նմանատիպ ցեղերից է: Այս մարդիկ ապրում են Հիմալայների ստորոտում: 2011 թվականի հաշվումներով՝ Հիմալայների անտառներում ապրում է 1,5 միլիոն թհարու, ովքեր կտրված են արտաքին աշխարհից և զբաղվում են հողագործությամբ ու որսորդությամբ: Լիբանանցի լուսանկարչին հատկապես գրավել են տեղի տարեց կանայք՝ իրենց արտասովոր դաջվածքներով:

Օմարը հատկապես տպավորվել է այս ցեղի 3 կանանց հետ զրույցից: 3-ն էլ տարբեր կերպ են մեկնաբանել վերջույթների դաջվածքների իմաստը: Առաջինը պատմել է, որ իրենց ցեղի գեղեցիկ աղջիկներին արքայական ընտանիքը պարբերաբար գերության է տարել: Ու ճարահատյալ թհարուներն իրենց աղջիկներին տգեղացրել են՝ վերջույթներին դաջվածքներ անելով:

     Երկրորդը պատմել է, թե հնուց ի վեր դաջվածք չունեցող «մաքուր» աղջիկները պիղծ են համարվել: Նրանց հետ ոչ ոք չի խոսել, կնության չեն առել, այն ամենն, ինչին նրանք դիպել են, ենթակա է եղել այրման: Դրա համար էլ բոլորն ստիպված դիմել են դաջվածքներ անողներին:
     Երրորդ կինն էլ ասել է, թե դաջվածքն արվել է ոչ թե մարմինը տգեղացնելու, այլ, հակառակը՝ գեղեցկությունն ընգծելու համար, և որ դաջվածքներով կինն անպայման դրախտ է ընկնում:

Թե որն է այս տարբերակներից ճշմարիտը, դժվար է հասկանալ, հնարավոր է, որ դրանք բոլորն էլ իրենց մեջ ճշմարտության հատիկ են պարունակում: