Իրադարձություններ

Փետրվարի 17-ին Արամ Խաչատրյանի տուն-թանգարանում Հայ կոմպոզիտորական արվեստի 8-րդ փառատոնի՝ Հարո Ստեփանյան-ֆեստի շրջանակներում ներկայացվել են Հարո Ստեփանյանի կամերային ստեղծագործությունները։ Երկու բաժնից կազմված երեկոյի ընթացքում հնչել են կոմպոզիտորի դաշնամուրի համար գրված պրելյուդները և ռոմանսները։
     «Կամերային այս համերգը փառատոնի շրջանակներում հետաքրքիր համագործակցության օրինակներից է. փառատոնը միշտ բաց է շնորհալի երիտասարդ երաժիշտների համար, և այս համերգին ելույթ ունեցան Երևանի պետական կոնսերվատորիայի ուսանողները։ Իսկ համերգի կուլմինացիան էր «Հովեր» պետական կեմերային երգչախմբի ելույթը»,- նշում է երգչախմբի գեղարվեստական ղեկավար և խմբավար Սոնա Հովհաննիսյանը։
     Դաշնակահար Արմեն Բաբախանյանը նկատում է, որ Հարո Ստեփանյանը մեծագույն հայ կոմպոզիտոր է, որի երաժշտությունը, ցավոք, ավելի քան 30 տարի գրեթե չէր հնչեցվում։ Եվ ողջունելի է, որ Հայաստանի պետական երիտասարդական նվագախմբի նախաձեռնությամբ հանդիսատեսն առիթ ունի լսելու մեր մեծերին։ Պարոն Բաբախանյանը հատկապես առանձնացնում է փառատոնի ձևաչափը. հնչում են ոչ միայն այն կոմպոզիտորի գործերը, ում նվիրված է փառատոնը, այլև անդրադարձ է կատարվում այլ կոմպոզիտորների ստեղծագործություններին։