Սպիտակ տունը կոչ է արել Ռուսաստանին առավել ստույգ նշան բռնել «Իսլամական պետության» դիրքերը ռմբակոծելու համար ու հայտարարել, որ 2 երկրների միջև բանակցությունները նախևառաջ վերաբերում էին ամերիկյան օդաչուների անվտանգությանը, գրում է «ԲիԲիՍի»-ն:
Երեկ՝ հոկտեմբերի 1-ին տեղի է ունեցել մեկ ժամանոց բանակցություն Պենտագոնի և ՌԴ պաշտպանության նախարարության միջև, հաղորդել է ամերիկացի նախագահի մամլո քարտուղար Ջոշ Էրնեստը:
Էրնեստը մտահոգություն է հայտնել, որ Ռուսաստանը ռմբակոծում է այն դիրքերը, որտեղ չկան ծայրահեղ իսլամիստների կուտակումներ, փոխարենը շատ են Ասադի ընդդիմադիրները, որոնց աջակցում է Արևմուտքը:
Հիշեցնենք, որ «Սիրիական հեղափոխական ու ընդդիմադիր ուժերի ազգային կալիցիայի» ներկայացուցիչ Հալեդ Խոջան երեկ թվիթերյան իր էջում գրել էր, որ ռուսական օդուժի հարվածներից զոհվել է 36 խաղաղ բնակիչ: Ավելի վաղ պաշտոնական Ռուսաստանը հերքել էր դա՝ ասելով, թե իր ավիահարվածներից ոչ մի խաղաղ բնակիչ չի զոհվել:
Դրան ի պատասխան՝ Իրաքում ամերիկյան զինվորականների ներկայացուցիչ գնդապետ Սթիվ Ուորենը հայտնել էր, որ իր տվյալներով՝ Ռուսաստանի ռազմաօդային ուժերի կողմից խոցված 12 կետերից և ոչ մեկը կապ չի ունեցել «Իսլամական պետության» հետ:
Ստորև ներկայացնում ենք Սիրիայի քարտեզը, որը ցույց է տալիս, թե ինչ ուժերի միջև է բզկտվել երբեմնի միասնական պետությունը: