Գերմանիան, ով հանդիսանում է Եվրոմիության երկրների մեջ Թուրքիայի առևտրային ամենամոտ գործընկերը, միացավ այն երկրների ցանկին, ովքեր 1915թ. հայերի նկատմամբ իրականացված իրադարձությունները որակում են ցեղասպանություն բառով: Ինչպես հաղորդում է «Ռոյթերս»-ն, այսօր Գերմանիայի խորհրդարանում՝ Բունդեսթագում, ձայների գերակշիռ մեծամասնությամբ հավանություն ստացավ հայերի կոտորածները ցեղասպանություն բառով կոչելու բանաձևը: Աղբյուրը նշում է, որ այդ բանաձևը ցույց է տալիս այս հարցում դիրքորոշման իրական փոփոխություն մի երկրում, որը մեծ ջանքեր է գործադրել՝ առերեսվելու Հոլոքոսթի ժամանակ վեց միլիոն հրեաների սպանության վերաբերյալ իր պատասխանատվության հետ: Հիշեցնենք, որ այսօր Գերմանիայի խորհրդարանի 101-րդ լիագումար նիստը սկսվել էր Հայոց ցեղասպանության թեմայի քննարկումով, և Բունդեսթագի նախագահ Նորբերթ Լամերթը հայերի կոտորածների մասին խոսելու ժամանակ օգտագործել էր ցեղասպանություն բառը: