Ryanair ավիաընկերության ինքնաթիռը, որը Դուբլին–Կրակով երթուղով թռչելիս է եղել, արտակարգ վայրէջք է կատարել Բեռլինում, հայտնել է Deutsche Welle-ն՝ հղում կատարելով Գերմանիայի ոստիկանությանը:
Ինքնաթիռը վայրէջք է կատարել նախօրեի երեկոյան և մնացել մինչև երկուշաբթի առավոտ: Վայրէջքից հետո ուղեբեռը ստուգել են կինոլոգները։ Որոշ ժամանակ անց ուղևորները շարունակել են թռիչքը պահեստային ինքնաթիռով։
Չնախատեսված վայրէջքի պատճառն «օդում վթարային իրադրությունն է» եղել, պարզաբանել են օդանավակայանում: Bild-ի տվյալներով՝ մեկ այլ հնարավոր պատճառ կարող է եղած լինել ինքնաթիռն ականապատելու մասին հաղորդումը:
Ստուգումից հետո պայթուցիկ սարքեր չեն հայտնաբերվել։