ՀՀ վարչապետ Նիկոլ Փաշինյանը՝ Интерфакс-ին տված հարցազրույցում հայտարարել է, որ ամուր խաղաղության հաստատման համար Թուրքիան պետք է փոխի Հայաստանի նկատմամբ իր ագրեսիվ քաղաքականությունը։
«Կցանկանայի հիշեցնել, որ հայ-թուրքական սահմանը միակողմանիորեն փակվել էր Թուրքիայի կողմից դեռևս 1993 թվականին։ Հայաստանը միշտ կողմ է եղել Թուրքիայի հետ առանց նախապայմանների հարաբերությունների կարգավորմանը, սակայն դա մերժվել է հենց Թուրքիայի կողմից։ Անկարայի նման թշնամական քաղաքականությունը նոր թափ է ստացել Արցախի դեմ Ադրբեջանի 44-օրյա ագրեսիայի ընթացքում։ Մասնավորապես, Թուրքիան Ադրբեջանին ուղղակի ռազմաքաղաքական և ռազմատեխնիկական աջակցություն է ցուցաբերել՝ Լեռնային Ղարաբաղի հակամարտության գոտի տեղափոխելով նաև օտարերկրյա զինյալ ահաբեկիչների։ Այս համատեքստում, ամուր խաղաղության հաստատման և տարածաշրջանում տնտեսական հեռանկարը վերականգնելու համար Թուրքիան պետք է փոխի Հայաստանի նկատմամբ այդ ագրեսիվ քաղաքականությունը»,- ասել է Փաշինյանը։