Արաբական պետությունների լիգայի ղեկավարը զգուշացրել է Թուրքիային Կովկասյան և Միջերկրածովյան տարածաշրջաններում լարվածության ուժեղացման գործում նրա դերի վերաբերյալ՝ հայտարարելով, որ «դա վատ ավարտ կունենա» այդ երկրի համար, այս մասին հայտնել է Arabnews-ը։
Արաբական պետությունների լիգայի գլխավոր քարտուղար Ահմեդ Աբուլ Ղեյթը հայտարարել է, որ Թուրքիայի նախագահ Ռեջեփ Թայիփ Էրդողանը միջամտել է Կովկասում Ադրբեջանի և Հայաստանի միջև խնդիրներին, բախվել Հունաստանի և Կիպրոսի հետ, հարձակվել Արևելյան Միջերկրածովյան գազային շրջանների վրա։
«Ինձ նյարդայնացնում է այն փաստը, որ սիրիացի վարձկաններ են օգտագործվում Ադրբեջանում՝ Հայաստանի դեմ պատերազմելու համար։ Շատ ցավալի է, որ սիրիացի վարձկաններին Էրդողանը օգտագործում է Թուրքիայի հետ կապ չունեցող դեպքերում»,- ասել է Աբուլ Ղեյթը։