«Արմնյուզ» հեռուստաընկերության եթերում ՀՀ ԱԺ «Իմ քայլը» խմբակցության անդամ Արմեն Խաչատրյանը հայտնել է, որ երկրում հանցավորության մակարդակն, ընդհանուր առմամբ, կառավարելի է, բացահայտված հանցագործությունների թիվն անցած տարվա համեմատ ավելացել է մոտ տասը տոկոսով. «Մեր օպերատիվ ծառայություններն աշխատում են գերծանրաբեռնված ռեժիմով: Միայն Երևանում ամեն օր 100-ից ավելի ՃՏՊ է տեղի ունենում: Վթարի են ենթարկվում անգամ ամենապրոֆեսիոնալ վարորդները: Պետք է ունենալ պատշաճ որակի հասարակական տրանսպորտ»,- ասել է նա:
Անդրադառնալով աղմկահարույց տեսանյութին, որում ոստիկանները հակագազով և մահակով ցուցմունք են կորզում, Խաչատրյանն ասել է.«Ոստիկանությունում վաղուց նման գործելաոճ չկա: Ոստիկանն առանց այն էլ պաշտպանված չէ: Նույնիսկ ոստիկանի իրավաչափ գործողությունները կարող են դիտարկվել որպես ոչ իրավաչափ: Այսօր որևէ ոստիկան չի հանդգնի նման կերպ ցուցմունք կորզել, որևէ ոստիկանի ղեկավար չի կարող ցուցում տալ, որ նա դուրս գա իր լիազորությունների սահմաններից»:
Նա նշել է, որ Ռուսաստանի կողմից մի շարք աղմկահարույց գործերով անցնող մեղադրյալների չարտահանձնելը դեռևս վերջնական չէ, օրինակ՝ Լևոն Սարգսյանի արտահանձնման գործընթացն ընթացքի մեջ է. «Դա ՌԴ-ի քաղաքականությամբ պայմանավորված գործընթաց է: Այստեղ ես մեր իրավապահ մարմինների մեղքը չեմ տեսնում, ի՞նչ մեղք ունեն նրանք, եթե ինչ-որ պետություն նման դիրքորոշում ունի: Դեռևս չկա որոշում, որ այդ մարդիկ չպետք է արտահանձնվեն»,- ասել է Խաչատրյանը:
Պատգամավորի կարծիքով՝ ԱԱԾ նախկին տնօրեն Արթուր Վանեցյանն իշխանության քաղաքական հակառակորդը չէ, ու քանի որ նա պետական պաշտոնյա չէ, ազատ է անելու քաղաքական հայտարարություններ: «Լինի Սորոսի գրասենյակը, թե այլ մեկը, եթե Հայաստանին վտանգ են սպառնում, անպայման կհայտնվեն իրավապահների տեսադաշտում, ու նրանցով կզբաղվեն»,- նշել է պատգամավորը:
Մանրամասները՝ տեսանյութում: