Apple ընկերության գործադիր տնօրեն Թիմ Կուկը հայտարարել է, որ կորպորացիան ֆինանսական միջոցներ կտրամադրի հրդեհներից հետո Ամազոնի անտառները վերականգնելու համար:
«Շատ ցավալի է տեսնել, թե ինչպես են հրդեհներն ու ավերածությունները շարունակվում Ամազոնի անտառներում, որոնք աշխարհում ամենակարևոր էկոհամակարգերն են»,- գրել է Կուկը՝ Twitter-ի իր էջում:
Ավելի վաղ Ֆրանսիայի նախագահ Էմանուել Մակրոնը Բրազիլիայում անտառային հրդեհներն անվանել էր միջազգային նշանակության ճգնաժամ: Բրազիլիայի նախագահ Ժաիր Բոլսոնարուն մեղադրանքներին պատասխանել էր, որ Ֆրանսիայի առաջնորդը քննարկում է հրդեհները միայն քաղաքական շահից ելնելով, և Մակրոնին մեղադրել էր գաղութատիրության մեջ:
Greenpeace-ի բնապահպանները հրդեհների թվի աճը կապում են նախագահ Բոլսանարուի վարած քաղաքականության հետ։ Բրազիլիան փորձում է անտառային տարածքները մաքրել հանքարդյունաբերական ձեռնարկությունների զարգացման և ֆերմերային տնտեսությունների համար որպես ազատ հող: