Իրադարձություններ

«Արդեն առաջին ահազանգն ենք ստացել ջրերի, հեղեղումների հետ կապված՝ Արմավիրի մարզի Երվանդաշատ գյուղից։ Այնտեղ Արաքսի ջրերը բարձրանում են և կարող են դաշտերը ծածկել»,- կառավարության այսօրվա նիստին զեկուցելով իրավիճակը՝ ասաց Արտակարգ իրավիճակների նախարար Ֆելիքս Ցոլակյանը՝ տեղեկացնելով, որ Սուրեն Պապիկյանի հետ խոսել է խնդրի մասին և պատրաստվում են գնալ, տեղում ծանոթանալ խնդրին և աշխատանքներ իրականացնել։

Նախարարի խոսքով՝ ակտիվացել են նաև սողանքները․ «Վեց տեղերում սողանք ունենք․ ակտիվ սողանք կա Լոռվա մարզում, որը սպառնում է անտառային շերտի հոսք՝ դեպի մի գյուղի ճանապարհ, որը կարող է փակվել, մոտ 600 000 տոննա հող կարող է լցվել, ճանապարհը փակել, որի մաքրելը բարդ է լինելու։ Երկրորդ ճանապարհ կա, որի մասին պետք է մտածել, մենք արել ենք ինչ-որ բաներ, զգուշացումներ են եղել համայնքապետարաններին: Խոսքն Աթան գյուղի մասին է»,- նշեց Ցոլակյանը՝ հավելելով, որ մեծ խնդիր են ներկայացնում նաև քարաթափումները. «2013-ին հաստատվել է հայեցակարգ սողանքների հետ կապված: Հիմա քարաթափման վտանգ կա Այրումի ճանապարհին: Կան պայթեցնող կազմակերպություններ: Հիմա որ պայթեցնողը գա, պայթեցնի, պետք է տրանսպորտի նախարարությունը գումար տա, դրա համար պետք է մրցույթ կազմակերպել: Մենք այդ ժամանակը չունենք: Դրա համար, թող այդ կառույցները իրենց մոտ ունենան որոշակի գումար, իսկ հետո թող հաշվետվություն տան: Պետք չի մտածել, որ այդ գումարն այլ տեղ կծախսեն: Եթե նման բան կանեն, թող պատժվեն»,- ասաց նա:

Վարչապետ Նիկոլ Փաշինյանը հանձնարարեց արագ գտնել մեխանիզմներ․ «Մենք պետք է գնանք կանխարգելման ճանապարհով, թե ինչպես պետք է իրականացնել աշխատանքները, որպեսզի խնդիրների առջև չկանգնենք»,- ասաց նա։