Քննարկումներ

Սամվել Բաբայանին ձերբակալելու օրը` մարտի 22-ը, Սերժ Սարգսյանն իզուր չէ ընտրել: Բաբայանին խաղից հանելու գործընթացը հենց 2000թ. մարտի 22-ին էր սկսվել: Սա իշխանության քայլերի տրամաբանության մեջ է:

Իմ երևակայությունը չի ներում, չեմ պատկերացնում՝ ինչո՞ւ պետք է ինչ-որ մեկը «Իգլա» տեսակի հրթիռային համալիր ներկրի ոչ օրինական ճանապարհով:
Ինչ վերաբերում է ապստամբությանը, «Իգլան» այն զենքը չէ, որով պետք է ապստամբություն անեն: Ես դա չեմ պատկերացնում: Ես Սամվել Բաբայանին խորությամբ չեմ ճանաչում, բայց համենայնդեպս, նա ինձ վրա չի թողնում անմեղսունակի տպավորություն, որ կարող էր նման քայլ անել՝ ապստամբության նպատակով: Նա բավականին խելոք անձնավորություն է իմ տպավորությամբ: Ինձ անհավանական է թվում, որ նա այդ քայլին կդիմեր: Այս ամբողջը շատ մութ պատմություն է: Ինչքան ես գիտեմ՝ նա Սերժ Սարգսյանին շատ լավ է ճանաչում, շատ լավ ճանաչելով՝ նա նաև գիտի Սերժ Սարգսյանի կառավարման եղանակը, հատուկ ծառայությունների ուշադրությունն իր նկատմամբ, և ես չեմ կարծում, որ նա այդքան հիմար գտնվեր, որ այդպիսի քայլի դիմեր: Իշխանությունները մեկուսացնում են նրան, քանի որ վտանգ են տեսնում իրենց համար, այդպես նաև Ժիրայր Սեֆիլյանի հետ վարվեցին: Մի կողմից նրանք մեկուսացնում են պոտենցիալ վտանգ ներկայացնող քաղաքական գործիչներին, մյուս կողմից կարող է նաև այլ հարց լինել: Ես սկսում եմ կասկածել դավադրությունների տեսությանը:

Դա հակաօդային պաշտպանության զենք է, որը միայն ՊՆ-ն իրավունք ունի ձեռք բերելու, ո՞նց կարող է քաղաքացին «ԻԳԼԱ» ձեռք բերել:

Սա քաղաքական քայլ է, սա Օհանյան-Րաֆֆի- Օսկանյան դաշինքի դեմ ուղղված հերթական քայլն է: Տեսնելով, որ հասարակության մոտ արագ աճում է վստահությունը մեր նկատմամբ, իշխանությունները գնացին հերթական բռնությանն ու ապօրինությանը:
Հաշվի առնելով Սամվել Բաբայանի հեղինակությունն ու կարողություններն` իրեն են թիրախավորել: Իշխանությունն առաջին հերթին ժողովրդից վախ ունի, և քանի որ գիտի, որ ժողովուրդն իրեն չի վստահում, իսկ Սամվել Բաբայանի նման գործիչներին վստահում է, նմանատիպ քայլերով փորձում է կասեցնել մեր աճը: Բացի այդ, Սամվել Բաբայանին ազատությունից զրկում են այն ժամանակ, երբ այստեղ լայնորեն քննարկվում է Արցախի խնդիրը և ակնհայտ է, որ Սամվել Բաբայանը կոշտ գծի կողմնակից է, ոչ թե հողերը վերադարձնելու: Սա է պատճառը, որ իրեն ազատությունից զրկում են:

Սամվել Բաբայանը, մյուս գեներալները, հրամանատարները, ովքեր հիմա ընդդիմադիր որևէ շրջանակի մեջ են մտել ու քաղաքականությամբ են զբաղվում, նրանք չունեն քաղաքական համապատասխան գիտելիք ու կարողություններ։ Հենց միայն Սամվել Բաբայանի ձերբակալությունը դրա վկայությունն է։ Կարողությունը հենց նա է, որ քաղաքական խնդիր ես դնում քո առջև և կարողանում ես լուծել այն։ Եթե ինչ-որ գործնական ծրագիր ես կազմել, բայց վարչախմբից անգամ մտադրությունցդ չես կարող թաքցնել, ապա դա անլուրջ է։ Վարչախումբը եթե անգամ «Իգլա» զենիթահրթիռային համալիր, Տ-72 տանկ կամ այլ զինատեսակ չգտի տանը, ապա առանց պատրվակի բերման կենթարկի ցանկացածին՝ այդ ընթացքում մի ատրճանակ խրելով գոտու արանքում, և նրան բերման ենթարկելու արձանագրությունը կկազմի անօրինակ զենք կրելու փաստով։ Սա է այս վարչախմբի ձեռագիրը և անլուրջ է զբաղվել քաղաքականությամբ` այս ամենն արհամարհելով։ Իհարկե ես հասկանում եմ, որ ինչ-որ անձի ձերբակալության մասին տեղեկատվությունը երբ լայն շրջանառություն է գտնում, դա արդեն իսկ որոշակի փուչիկ է դառնում հանրության համար։ Բայց փաստն այն է, որ տվյալ անձը չի ունեցել համապատասխան հատկանիշներ վարչախմբի դեմ պայքարում հաջողելու համար։

Կփորձեն քաղաքական երանգ տալ, բայց թողնենք իրավապահները զբաղվեն: Չեմ կիսում «Օհանյան-Րաֆֆի-Օսկանյան» դաշինքի ներկայացուցիչների պնդումները, որ Սամվել Բաբայանի ազատազրկումը նպատակ ունի խոչընդոտել ընդդիմադիր դաշինքի մուտքը խորհրդարան: Այդ ուժն այդքան ռեյտինգ չունի։ Ես ինքս երկու սոցիոլոգիական հարցում եմ արել, և սոցիոլոգները կարող են դա փաստել:

Սամվել Բաբայանը մեր գաղափարակից ընկերն է, մեր համակիրն է: Այս քայլը դաշինքի նկատմամբ շարունակական հաջորդականության վերաբերմունքի արդյունքը կարող է լինել: