Սամիթի բազում օգտակար հատկանիշները
Սամիթ (Anethum graveolens, հայերեն այլ անվանումներ՝ բաղբակ, տերաթողիկ), նեխուրազգիների ընտանիքին (Apiaceae) պատկանող միամյա տերևաբանջար է։ Օգտագործվում է որպես թարմ կանաչի, որպես համեմունք՝ վարունգի և այլ թթուների մեջ, իսկ ձմռան ժամանակ կերակուրների մեջ օգտագործվում է չորացված սամիթը։ Սամիթը նախ և առաջ արագորեն հանում է ստամոքսի և աղիքների անոթների կծկումները, պայքարում է աղիներում առկա նեխման և թթվեցման գործընթացների դեմ: Սամիթը նվազեցնում է արյան և ներակնային ճնշումն, արդյունավետ է ուղեղի անոթների աթերոսկլերոզի, գլխացավի, երիկամաքարային հիվանդությունների բուժման ժամանակ: Սամիթի սերմերն օգտագործում են երիկամների հիվանդությունների կանխարգելման համար: Այդ նպատակով սերմերը լցնում են մեկ բաժակ եռացրած ջրի մեջ, թրմում 10-15 րոպե և օրական 3-4 անգամ խմում մեկական ճաշի գդալ: Կրծքահեղձուկի կանխարգելման համար սամիթի մանրացրած սերմերը լցնում են 300 մլ եռացող ջրի մեջ, թրմում մեկ ժամ, սառեցնում և խմում կես բաժակ օրը 3 անգամ: Ցիստիտների, բրոնխիալ ասթմայի ժամանակ ժողովրդական բժշկությունը խորհուրդ է տալիս 2 ճաշի գդալ սերմերը 400 մլ ջրում թրմել 30 րոպե և խմել օրական 2-3 անգամ: Սամիթի սերմերի մեկ այլ թուրմ հայտի է որպես միզամուղ և խորխաբեր միջոց: Դրա համար 1 ճաշի գդալ սերմի վրա լցնում են մեկ բաժակ եռացող ջուր, թրմում են 15-20 րոպե, թողնում են, որ սառչի, ավելացնում են մեղր և սառեցված վիճակում խմում են մեկական ճաշի գդալ օրը 4-5 անգամ: Այս խառնուրդը պարբերաբար օգտագործողների մոտ բարելավվում է նյարդային համակարգը, նվազում է արյան ճնշումը, դադարում են միգրեններն, անցնում է անքնությունը: Անքնության դեմ պայքարի լավ միջոց է նաև 50 գ սամիթի սերմերի և կես լ կարմիր գինու խառնուրդը, որից 50 մլ խմում են քնելուց առաջ: Սամիթի սերմերի թրջոցներով բուժում են նաև կոնյուկտիվիտը և կանխում կատարակտայի առաջացումը: Սամիթի սերմերի թունդ թուրմով լվացվելն օգտակար է պզուկոտ մաշկի դեմքում: Սամիթաջուրը կիրառում են նաև նորածին երեխաների ստամոքսի ցավերը մեղմելու և գազերը հեռացնելու համար: |