Քաղաքացիական ակտիվիստ Դավիթ Սանասարյանը երեկվանից Ազատության հրապարակում հացադուլ է հայտարարել: Հացադուլն ուղղված է ՀՀ քաղաքացիներին: Ինչպես ՄԱՄՈՒԼ.am-ի թղթակցի հետ զրույցում հայտնեց` ինքնազգացողությունը լավ է, գիշերն էլ խաղաղ է անցել: Ստորև ներկայացնում ենք նրա հետ մեր թղթակցի զրույցը:
- Դավիթ, ո՞վ էր այն երիտասարդը, որ այսօր կարել էր բերանը:
- Հովհաննեսն էր: Ամեն դեպքում ես իրեն խորհուրդ եմ տվել, որ չգնա այդ քայլին:
- Ձեզ էլ էին խորհուրդ տալիս` չգնալ այս քայլին: Կարծում եք հացադուլը հարցի լուծո՞ւմ է: Երեկվանից կարծիքներ են հնչում, որ դրանով միայն Ձեզ եք վնասում:
- Հասկանալի է` ծայրահեղ քայլ է դա: Իմ արածը հարցի լուծում չէ, բայց սա իմ բողոքի արտահայտման ձևն է և ուղղված է ժողովրդին, որ տանը նստած` ֆեսբուքներում քննադատում ու ծաղրում են: Ես նստելու եմ հացադուլի, դա իմ որոշումն է:
- Մինչև հինգշաբթի՞:
- Դժվար է ասել: Ես անժամկետ եմ նստել: Եթե հինգշաբթի այստեղ հավաքվի կրիտիկական զանգված, դուրս կգամ հացադուլից և ավելի գործուն քայլերով հարցին լուծում կգտնեմ:
- Չե՞ք նեղվում…
- Չեմ նեղվում: Իմունիտետ ունեմ: Ես ինքս եմ մարդկանց հույս տալիս, ոգևորում, ես ինքս պինդ եմ և վաղուց նման հարձակումների սովոր: Նման հեգնանքների ականատես եղել եմ… Իմ խնդիրը դա չէ, ավելի շատ ես խնդիր ունեմ աջակցության: Ոչ թե ինձ աջակցեն, այլ գան էստեղ և փորձենք միասին խնդիր լուծել: Վաղը, հնարավոր է, առողջական վիճակս վատանա և ես այլևս չկարողանամ ոչինչ անել: Խնդիրը չլուծվեց դրանով: Ես գնացել եմ նման ծայրահեղ քայլի, որովհետև գալով էստեղ ես ուղղակի վստահ էի, որ Բաղրամյան պողոտայից մեզ բռնի ուժով հանելուց հետո այստեղ պետք է մարդկանց հոսք լինի: Իսկ մարդիկ շարունակում են մնալ տանը, և տպավորություն է ստեղծվում, որ սա մի քանի հոգու պայքար է, որոնք դուրս են եկել իրենց իրավունքները պաշտպանելու և դա չի վերաբերում մյուսներին: Իմ կարծիքով, շատերը խաբկանքի մեջ են, որ կարծում են` Սերժ Սարգսյանը հարցի լուծում է տվել: Նման բան չկա, ընդհակառակը, կիսաքայլերով հարցը ավելի է խճճում ու էդ պահին կար լուծման տարբերակ: Հիմա մարդիկ եթե մնան տանը, Ս. Սարգսյանը շատ հանգիստ գնալու է ավելի փափուկ լուծումների:
- Շարժումը լավ սկսվեց, կարելի ասել, ամեն ինչ շատ գեղեցիկ էր, ի՞նչ կատարվեց, ինչո՞ւ կոտրվեց: Տղաները եթե չնահանջեին, միգուցե այսօր ուրիշ պատկեր ունենայինք…
- Ընդհանրապես, եթե կա շարժում, ցանկացած մի քայլ նահանջը շարժմանը լուրջ վնաս է հասցնում:
Նրանց ամենևին չեմ մեղադրում, տղաներն էլ իրենց վախերն ունեին, որ կարող էր արյունահեղություն լիներ և իրենք պատասխանատվություն կրեին: Նրանց էլ եմ հասկանում: Բայց, եթե որոշել ես, որ գնում ես Բաղրամյան փողոց, ապա պետք է պատրաստ լինես ցանկացած զարգացումների: Ավելի շատ ամուր պետք է լինել և զգացմունքային բաները թողնել մի կողմ:
- Գիշերն ինչպե՞ս անցկացրիք, շա՞տ էին ցուցարարները:
- Կարելի է ասել` երկու անգամ ավելի շատ, քան երեկ Բաղրամյան պողոտայում:
- Ցուցարաներն ասացին, որ ոստիկանները փորձել են խոչընդոտել հովանոց տեղադրելուն, ի՞նչ էին պատճառաբանում, որ չէին թույլատրում:
- Սկզբից չէին թողնում, հետո օրենքից մի քանի հղում արեցի, հասկացան, որ անիմաստ լարվածություն են առաջացնում, որ այս հովանոցն իրենց չի խանգարելու: Ես այստեղ առևտրով չեմ զբաղված: Ես ինքս ավագանու անդամ եմ, կարող եմ դիմել և որոշակի բաների համար թույլտվություն ստանալ, բայց չեմ ուզում, ես այստեղ որպես շարքային քաղաքացի եմ, կուսակցություն չեմ ներկայացնում: Այս պահին «Ժառանգության» հետ կապված ոչ մի հարցի չեմ պատասխանում: Ոչ թե նրա համար, որ խնդիր ունեմ իմ կուսակիցների հետ, այլ որ փորձում են շարժման վրա բիծ քաշել` կուսակցական պատկանելությունն են մեջբերում, զրպարտում են, թե իբր ես արևմուտքից ուղղարկված մարդ եմ և այլն: Սա իմ կազմակերպությունը չի և իրականում եթե հասնեն իրենց նպատակին և կարողանան ինձ ամբողջությամբ վարկաբեկել, ես կգնամ, վերջին շարքում կկանգնեմ ու կշարունակեմ պայքարս: Ես այստեղ չեմ ինչ-որ մի երկրի հետ դաշնակցելու, Հայաստանին ինչ-որ երկրի հետ միավորելու նպատակով: Այստեղ ուրիշ խնդիր է դրված, երկրին տեր լինելու խնդիրը: Դա պետք է ամեն քաղաքացի հասկանա, որ մենք հնազանդ լինելով շարունակում ենք լինել ստրուկի կարգավիճակում:
- Փաստորեն պայքարը քաղաքականացվեց, թեպետ այսօր էլ շատերը համառորեն պնդում են, թե այն միայն սոցիալական է…
- Պայքարն, ի սկզբանե, քաղաքական էր: Ուղղակի չեմ հասկանում, թե ինչու մարդիկ փորձեցին ուրիշ ձևակերպում տալ: Պահանջների կետերը չեն փոխվել, բայց պայքարը քաղաքական է եղել: Գիտելիքներից պետք է զուրկ լինել, որպեսզի իշխանության հետ պայքարն անվանել այլ պայքար: Ամեն մեկը պետք է հասկանա` եթե պահանջը իշխանությանն է, եթե կա խնդիր երկու պետությունների միջև, եթե քաղաքացին դուրս է գալիս ու ոչ թե ասենք ՀԷՑ-ին է պահանջ ներկայացնում, այլ իշխանությանը…ՀԷՑ-ին պահանջ ներկայացնելը դա չի նշանակում քաղաքական պահանջ, դա կլիներ քաղաքացիական կամ սոցիալական պահանջ:
- Աուդիտի հետ հույսեր կապո՞ւմ եք, հնարավոր համարո՞ւմ եք, որ, ի վերջո, կչեղարկվի էլեկտրաէներգիայի նոր սակագինը:
- Տարիներիս փորձառությունը հուշում է, որ դա խաբկանք է, մարդկանց համոզելու, ցրելու տարբերակ է: Չի լինելու նման բան: Այստեղ շատ լուրջ խնդիրներ կան: Միայն գիտեմ, որ իշխանությունները երբեք իրենք իրենց դեմ դուրս չեն գա: Եթե իշխանություններն այս գործընթացը երկարացնում են, իմ կարծիքով, դրսի հետ առևտուր են անում: Էական չէ` ինչ առևտուր, բայց որ անում են, դա հաստատ է:
