Իրադարձություններ

     Օրեր առաջ հայտնել էինք, որ Երևան ժամանած «Հայկական վերածնունդ» համահայկական կազմակերպության Փարիզի մասնաճյուղի համակարգող, Ֆրանսիայի քաղաքացի Շանթ Ոսկերչյանին թույլ չեն տվել մուտք գործել Հայաստանի Հանրապետության տարածք` իր կամքին հակառակ հետ են ուղարկել Ֆրանսիա` Երևան-Փարիզ չվերթով:
     «Հայկական վերածնունդ» շարժման Փարիզի մասնաճյուղն իր ֆեյսբուքյան էջում հայտարարություն է տարածել` մտահոգություն հայտնելով տեղի ունեցածի վերաբերյալ: Ըստ նրանց` ՀՀ իշխանությունները սկսել են որոշել, թե ով կարող է զբաղվել քաղաքականությամբ, և ինչպիսի հայացքներ ունեցող հայերը կարող են մտնել Հայաստան:
     «Ավետիսյան ընտանիքի ոչնչացնողն իրենց քթի տակ է, բայց իրենք վախից պատրաստ են սահմանադրությունը ոտնահարել: Իսկ իրենց մտքերը չկիսող քաղաքացիների վրա ուղարկում են ԱԱԾ-ին»,- նշված է տեքստում:
     Հիշեցնենք` Ոսկերչյանը Երևանում պիտի մասնակցեր մայիսի վերջին «Հիմնադիր խորհրդարանի» հրավիրած հանրահավաքին: Սփյուռքի նախարար Հրանուշ Հակոբյանը լրատվամիջոցների հետ զրույցում ասել էր, որ Շանթ Ոսկերչյանը Ֆրանսիայում իրականացրել է քայլեր, որոնք Հայաստանի Հանրապետության հետ կապված խնդիրներ են առաջադրել, և դա է պատճառը եղել, որ նրա մուտքը Հայաստան արգելվել է: