Գարնանային երանգները նոր շունչ են առնում Shushan&Tatev ապրանքանիշի զարդերում
 Գույներն ու այդ գույներից ստացված նորանոր երանգներն են թելադրում ինչ պատրաստել և ոգեշնչում ստեղծագործել ու ընկղմվել աշխատանքային ընթացքի մեջ... Ամեն ինչ սկսվեց նրանից, որ երկու քույրերը` Տաթևն ու Շուշանը, որոշեցին զարդեր պատրաստել իրենց և ընկերների համար: Արձագանքները բավականին խոստումնալից էին, շուտով հասկացան, որ պետք է շարունակել և զարդերը ներկայացնել արդեն որպես ապրանքանիշ:       «Գեղեցիկի նկատմամբ ընկալումը փոխանցվել է ծնողներից, հատկապես` մայրիկից, ով հանդիսանում է մեր մեծ օգնականն այս գործում»,- մեզ հետ զրույցում անկեղծացավ Տաթևը: Shushan&Tatev ապրանքանիշի բոլոր զարդերը հեղինակային են և պատրաստվում են քույրերի մտահղացմամբ ու դիզայնով: Պահպանելով իրենց ոճային առանձնահատկությունը՝ նրանք կարողանում են ընդառաջ գնալ պատվիրատուին և իրականություն դարձնել նրանց անհատական մտքերից ծնված զարդեր: «Հիմնականում աշխատում ենք պոլիմերային կավի, էմալի, ակրիլային նյութերի, բրոնզի, արծաթի և ոսկու համադրությամբ: Անընդհատ փորձում ենք նոր շունչ հաղորդել զարդերին, նոր դետալներ ու նոր նյութեր ավելացնել: Այժմ սկսել ենք հայկական զարդանախշերն ուսումնասիրելով` նաև դրանցից տարրեր ներառել զարդերի մեջ»,- պատմեց Տաթևն, ով տատիկի ձեղնահարկում գտնելով նրա ասեղնագործությամբ պատկերված խաչը, վերարտադրել է զարդի վրա՝ երկրորդ կյանք պարգևելով ձեռագործ նկարին:    «Երբեմն նաև թրենդ համարվող ապրանքանիշերից որոշ տարրեր ենք օգտագործում»: Ցանկության դեպքում կազմակերպվում է նաև զարդերի արագ առաքում կամ «Հայփոստ»-ի միջոցով` 1-2 օրվա ընթացքում: |
