Բրիտանական «Daily Mail» պարբերականն անդրադարձել է Հայաստանի կենդանաբանական այգիներից մեկին՝ այն որակելով աշխարհում ամենից տխուրը:
Աղբյուրը նշում է, որ կենդանաբանական այգին գտնվում է Գյումրիում: «Աշխարհի ամենատխուր կենդանաբանական այգին նաև ամենափոքրն է. երեք առյուծ, երկու արջ, երկու բորենի: Դրանք ձեռք են բերվել մի օլիգարխի կողմից, ով այն ծառայեցրել է իր ընկերներին ցուցադրելու և դրանցով հպարտանալու նպատակով, սակայն այժմ զվարճանքներն ավարտվել են և կենդանաբանական այգու օլիգարխ սեփականատերն անհետացել է՝ կենդանիներին իսկական անտերության մատնելով: Այժմ այդ կենդանաբանական այգու լուսանկարները ցուցադրում են, թե ինչպես են կենդանիներն օրեցօր խելագարվելու շեմին մոտենում՝ այդ անբնական և լքված պայմանների պատճառով»,- նշվում է հոդվածում:
Պարբերականը հավելել է նաև, որ այժմ խեղճ կենդանիները գտնվում են մի տարեց զույգի՝ թոշակառուներ Հովհաննես և Ալվինա Մադոյանների խնամակալության ներքո, ովքեր սպանդանոցից ուտելիք են հայթայթում և կերակրում կենդանիներին՝ նրանց կյանքը փրկելու անհույս ճիգեր գործադրելով:
Վերջում հիշեցվում է, որ Գյումրի քաղաքից են նաև Քիմ և Քլոե Քարդաշյանները: