Իրադարձություններ

     Թբիլիսիում ընթացող ծանրամարտի Եվրոպայի առաջնության 77 կգ քաշային կարգի տղամարդկանց պայքարում այսօր տոն էր մեր մարզիկների համար։ Հայաստանի երկու ներկայացուցիչները՝ Տիգրան Մարտիրոսյանը և Անդրանիկ Կարապետյանը, փառահեղ ելույթ ունեցան՝ նվաճելով ոսկե և բրոնզե մեդալները։ Տիգրանը, պոկելով 160 և հրելով 191 կգ, երկամարտի 351 կգ արդյունքով հռչակվեց Եվրոպայի չեմպիոն։ Անդրանիկը, պոկելով 164 կգ և հրելով 186 կգ, երկամարտի 350 կգ արդյունքով նվաճեց բրոնզե մեդալը։ Աշխարհի և Եվրոպայի չեմպիոն, օլիմպիական խաղերի բրոնզե մեդալակիր Տիգրան Մարտիրոսյանը պոկում վարժությունում բարձրացրեց 155 կգ և 160 կգ՝ ձախողելով 162 կգ մոտեցումը։ Սակայն, դա նրան չխանգարեց նվաճել փոքր արծաթե մեդալ։ Հրում վարժությունում նա կատարեց 2 մոտեցում՝ հրելով 185 և 191 կգ։ Երրորդ մոտեցումից մեր մարզիկը հրաժարվեց, քանի որ արդեն դարձել էր չեմպիոն։ Պոկում վարժությունում 19-ամյա Անդրանիկ Կարապետյանը հստակ կատարեց իր 3 մոտեցումները։ Պոկելով 156 կգ, 161 կգ և 164 կգ՝ Անդրանիկը նվաճեց փոքր ոսկե մեդալ։ Հրում վարժությունում, ցավոք, Անդրանիկը ձախողեց իր երկու մոտեցումները՝ հրելով 186 կգ։ Նա հրումում 4-րդն էր, սակայն, պոկումի փոքր ոսկու շնորհիվ, նվաճեց երկամարտի բրոնզե մեդալ։ Արծաթե մեդալի արժանացավ Ռուսաստանի ներկայացուցիչ Վիկտոր Գեցը։ Նա, կատարելով բոլոր 6 մոտեցումները, և՛ պոկումում, և՛ հրումում ցույց տվեց Տիգրան Մարտիրոսյանի նույն՝ 160 կգ և 191 կգ արդյունքը, սակայն, անձնական քաշով ավելի ծանր լինելով մեր մարզիկից, դարձավ փոխչեմպիոն: