Միջազգային

Գերմանիայի կանցլեր Անգելա Մերկելը հայտարարել է, որ որոշում է կայացրել վտարել ռուս դիվանագետներին՝ Մոսկվայի կողմից անբավարար օգնության պատճառով՝ չեչեն դաշտային նախկին հրամանատար Զելիմխան Խանգոշվիլիի սպանության գործի քննության հարցում, հայտնում է ТАСС գործակալությունը:

«Մենք համապատասխան միջոցներ ձեռնարկեցինք, քանզի չտեսանք, որ Ռուսաստանը սատարում է մեզ սպանության քննության հարցում»,- հայտարարել է Մերկելը:
     Ըստ կանցլերի` նա մտադիր է Ռուսաստանի նախագահ Վլադիմիր Պուտինի հետ քննարկել դիվանագետների վտարումը «նորմանդյան ձևաչափով» գագաթնաժողովի ընթացքում, որը տեղի է ունենալու դեկտեմբերի 9-ին:

Ավելի վաղ Ռուսաստանի արտգործնախարարությունն արձագանքել էր Բեռլինից դիվանագետների վտարմանը՝ այն անվանելով «անհիմն և ոչ բարեկամական» որոշում: «Մենք ստիպված ենք իրականացնել մի շարք արձագանքող միջոցառումներ»,- նշել են գերատեսչությունից: