«Երբ կարդացի դատավոր Դ. Գրիգորյանի որոշումը Ռ. Քոչարյանի խափանման միջոցը փոխելու մասին, այնտեղ գտա տողեր, որից ուղղակիորեն նշմարվում էր, որ հաջորդ որոշումը դատարանը կայացնելու է այն մասին, որ՝ դիմում եմ ՍԴ: Դա ակնհայտ էր: Դրան հետևեց վարչապետի ելույթը, իսկ դրա հաջորդ օրը՝ ինքնաբուխ կերպով փակվեցին մեր դատարանները: Այսինքն՝ սահմանադրական կարգը խախտվեց, տապալվեց, ի դեպ, խախտվեց-տապալվեցի միջև այնքան մեծ տարբերություն կա, դրա մասին պատեհ առիթը կգա՝ կխոսենք»,- հունիսի 21-ին լրագրողների հետ հանդիպմանը հայտարարեց Ռ. Քոչարյանի փաստաբանական խմբի անդամ Ռուբեն Սահակյանը՝ խոսելով գործի շրջանակում դատարանների կայացրած որոշումների մասին:
Փաստաբանը չբացառեց, որ վաղն իսկ ՍԴ դռները կփակվեն, որպեսզի ՍԴ նախագահ Հ. Թովմասյանը և մյուսները չկարողանան մտնել դատարանի շենք: Ըստ նրա՝ նման քայլերն արվում են այն ժամանակ, երբ վտանգ են տեսնում Ռ. Քոչարյանի գործից՝ ինչպե՞ս կարող է Ռ. Քոչարյանը ազատության մեջ մնալ:
Ռ. Սահակյանը, խոսելով դատավոր Ա. Դանիելյանի մասին, նկատեց, որ նա բարձր պրոֆեսիոնալ է իր մասնագիտության մեջ: «Այլ հարց են մարդկային հատկանիշները: Կարողանո՞ւմ է օրենքն օրենքի տառին համապատասխան կիրառել, թե՞ քիթն անընդհատ պահում է այն ուղղությամբ, թե ինչպես է մտածում իշխանությունը՝ ժամանակին Ռ. Քոչարյանի, Ս. Սարգսյանի և այսօր էլ՝ այսօրվա իշխանությունը: Ամենամեծ ունակությունն իր մոտ է: Երբ ես Փաստաբանների պալատի նախագահ էի, դատավորներն ինձ մոտենում էին ու ասում՝ խնդրում ենք գործը չմակագրել Դանիելյանին: Այն ժամանակ չկար մակագրման էլեկտրոնային համակարգը: Սա վկայում է այն մասին, որ այս անձնավորությունը կատարում է հիմնականում պատվեր: Կարող է պատվեր իջեցված չլիներ, բայց բավական է ինքը զգար, թե ինչպես է մտածում դատախազությունը, անմիջապես արձագանքում էր»,-ամփոփեց փաստաբանը: