Այսօր ՄԱԿ-ում ԱՄՆ-ի մշտական ներկայացուցիչ Նիքի Հեյլին Մերձավոր Արևելքում և տարածաշրջանի սահմաններից դուրս Իրանի «ապակայունացնող գործողությունների մասին անհերքելի ապացույցներ» կհրապարակի:
Այս մասին ասվում է ամերիկյան մշտական ներկայացուցչության հաղորդագրության մեջ:
«Նա (Հեյլին) կպատմի այն մասին, որ Իրանը շարունակում է իր ապակայունացնող գործողությունները Մերձավոր Արևելքում և ողջ աշխարհում: Հեյլին ապացույցներ կներկայացնի այն մասին, որ Իրանը դիտավորյալ խախտում է իր միջազգային պարտավորությունները, որոնք փորձում է, սակայն չի կարողանում թաքցնել»,- ասվում է հաղորդագրության մեջ:
Փաստաթղթում չի հստակեցվում, թե կոնկրետ ինչ բնույթի խախտումների մասին է խոսքը: Դիվանագիտական առաքելությունը նշում է միայն, որ Հեյլին ուշադրություն կհատկացնի ՄԱԿ-ի Անվտանգության խորհրդի զեկույցին, որն ընդունվել է 2015թ.՝ Իրանի միջուկային գործարքի աջակցման համար:
Ավելի վաղ NBC-ն հայտնել էր, որ ԱՄՆ նախագահի վարչակազմը մտադիր է ապացույցներ ներկայացնել այն մասին, որ Թեհրանը հրթիռներ է մատակարարում Եմենի ապստամբ հուսիթներին: