Ուկրաինան հայտարարել է, որ թույլ կտա Ռուսաստանի ներկայացուցչի մասնակցությունը «Եվրոտեսիլին» միայն այն պայմանով, որ Ռուսաստանը փոխարինի Սամոյլովային մեկ այլ մասնակցով, ով խնդիրներ չի ունենա ուկրաինական օրենսդրության հետ: Այս մասին հայտարարել է Ուկրաինայի փոխվարչապետ Վյաչեսլավ Կիրիլենկոն:
«Անխոս, մենք պատրաստ ենք ընդունել «Եվրոտեսիլի» մասնակցի բոլոր 43 երկրների ներկայացուցիչներին, այդ թվում և` Ռուսաստանի: Ռուսաստանն ինքը կարող է իր համար ելք գտնել այս իրավիճակից` առաջարկելով այնպիսի մասնակցի, ով խնդիրներ չունի Ուկրաինայի օրենսդրության հետ: Այդ դեպքում այդ խնդիրը շատ արագ կլուծվի»,- ասել է նա:
Ինչպես հայտնի է, Ռուսաստանի մասնակից Սամոյլովան պետք է մրցույթին ներկայանար «Flame Is Burning» երգով, սակայն նրա մուտքն Ուկրաինա արգելվել է` Ղրիմում ելույթ ունենալու պատճառով: Այն, որ հենց այս մասնակցին է Ռուսաստանը ներկայացրել, ուկրաինական կողմը համարում է կանխամտածված պրովոկացիա: «Մենք տեսնում ենք, որ «Եվրոտեսիլի» հետ կապված այս պրովոկացիան Ռուսաստանի կողմից ընդամենը մի փոքրիկ օղակն է պրովոկացիաների ու Ուկրաինայում իրադրությունը սրող գործողությունների մեծ շղթայի»,- ասել է քաղաքական գործիչը: