Հարցազրույցներ

Բանաստեղծ, գեղանկարիչ, թարգմանիչ, Մովսես Խորենացի մեդալակիր Արևշատ Ավագյանի «Խոսք, գույն, մեղեդի» յուրօրինակ խորագիրը կրող ստեղծագործական երեկոյի ընթացքում ցուցադրվեցին նրա գեղանկարչական նոր աշխատանքները:

«Հնչեցին իմ ստեղծագործությունները, իմ տեքստերով գրված երգերը, ինչպես նաև ցուցադրվեցին նախորդ տարվա ստեղծագործություններն ու նոր գործերը»,-MAMUL.am-ի թղթակցի հետ զրույցում ասաց արվեստագետը: Նրա խոսքով` այժմ նոր երգերի ու բանաստեղծությունների վրա է աշխատում, նաև նոր նկարներ է նկարում:

«Այսօրվա իրականությունն ինչ-որ մի տեղ շատ տխուր է, և ես իմ արվեստի մեջ փորձում եմ ոչ միայն օրվա խնդիրներով առաջնորդվել, այլ` հավերժական թեմաներով: Նկարներիս մեջ կա այն հավատն ու սերը, որ թևածում է որպես երազանք, որպես լույս, մաքրություն ու բարություն…հենց դրանք եմ փորձում նկարներիս միջոցով հասցնել իմ արվեստասերներին»,- ասաց նկարիչը: Նրա խոսքով` որքան էլ այսօրվա իրականությունն իրեն մտահոգում է, բայց չի հուսահատվում և հավատում է մեր ազգի, ժողովրդի, մեր մշակույթի ապագային: «Շատ կուզեի, որ ամեն ինչ ազգային ու համամարդկային լիներ մեր միջավայրում. կամեցող, իրար սիրող ու գնահատող, իրար չժխտող, իրար չհեգնող և իրար ձեռք չառնող»:

Արևշատ Ավագյանն իր արվեստի միջոցով փորձում է մարդկանց համախմբել, հավատ ներշնչել: «Այն, որ այդ հավաքական կամքը մեր ժողովրդի ապագայի հանդեպ իմ աշխատանքներով երևում է, ինձ ուրախացնում է»,-ամփոփեց նկարիչը: