Հետաքրքիր է

Յորքշիրի համալսարանի գիտնականները առաջին անգամ կարողացել են հետևել, թե ինչպես են թութակներն օգտագործում ծովային քարերն ու փյունիկյան արմավենու կորիզները ծովախեցիների մեջից կալցիում հանելու համար: Հետազոտություններն իրականացվել են Coracopsis vasa տեսակի 10 թութակի հետ: Պարզվել է, որ թռչունները ոչ միայն կարողանում են խեցիներից կալցիում հանել, այլև՝ կիսվել իրենց «աշխատանքային գործիքներով» այլ ցեղակիցների հետ: Քարերով ու կորիզներով թութակները քերել են խեցիների պատերից սննդարար նյութն ու կերել:

Թութակներին հետևել են 8 ամիս շարունակ՝ մարտից մինչև հոկտեմբեր: Ծովախեցիների հանդեպ հետաքրքրությունը առավել նկատվել է մարտից մինչև ապրիլի կեսեր ընկած ժամանակահատվածում, երբ փետրավորները հատկապես սուր են զգում կալցիումի կարիք ձվադրումից առաջ: Հետազոտողներին սկզբում շատ զարմացրել է այն փաստը, որ առավել շատ արուներն են հետաքրքրված եղել խեցիներով, սակայն հետո պարզվել է, որ արուները հիմնականում էգերին են տալիս իրենց հայթայթած կալցիումը: