Խնդրում ենք սպասել...

Հարցազրույցներ

«Տեղեկատվություն կա, որ նռնակները ժամկետանց են եղել»․ Գոհար Մելոյան

11:24, երեքշաբթի, 18 հունիսի, 2024 թ.
«Տեղեկատվություն կա, որ նռնակները ժամկետանց են եղել»․ Գոհար Մելոյան

«Հունիսի 12-ին Բաղրամյան պողոտայում քաղաքացիների ուղղությամբ շուրջ 3 տասնյակ նռնակ է նետվել»,- այս մասին 24TV-ի եթերում ասել է իրավագետ, դեպքերի ականատես Գոհար Մելոյանը։ «Մի քանի բախում տեղի ունեցավ ոստիկանների և ցուցարարների միջև, ընդ որում՝ ընդդիմադիր գործիչները որևիցե միտում չունեին գործողություններ հրահրելու։ Անհամաչափ ու տարաբնույթ էր ոստիկանների արձագանքը, տպավորություն էր, որ իրենք պատրաստված էին՝ հատուկ ուժ և միջոցներ կիրառելու: Ամենակարևոր հանգամանքներից մեկն այն է, որ ամբողջ ընթացքում իրազեկում չեմ լսել հատուկ միջոցների կիրառման մասին։ Եթե պատի տակ ասում են՝ ես հեսա հատուկ միջոց եմ կիրառելու, դա իրազեկում չէ»,- նշել է նա՝ հավելելով, որ առաջին նռնակները նետվել են այգու ուղղությամբ՝ հանգիստը վայելող քաղաքացիների վրա։
     «Լուսաձայնային նռնակները, որոնք ունեն կիրառման հատուկ չափորոշիչներ, գործածվում են անկարգությունները կամ որոշ հանցագործությունները կանխարգելելու համար, ու ամենակարևոր պայմանը՝ արգելվում է դրանց կրկնակի կիրառումը: Եթե սա իրոք դիտավորություն էր մարդկանց հետ հաշվեհարդար տեսնելու, ապա որևէ բացատրություն չի կարող ունենալ: Պետք է բացահայտել՝ ով էր հրաման տվողը, ով էր հրաման կատարողը, ինչ տեսակի նռնակ է կիրառվել մարդկանց նկատմամբ։ Տեղեկատվություն է շրջանառվում, որ այս նռնակների տեսակները ոստիկանության պահեստազորից դուրս գրված են եղել և հավանականություն կա, որ դրանք ժամկետանց են եղել»,- ընդգծել է Մելոյանը:

«Տեղեկատվություն կա, որ նռնակները ժամկետանց են եղել»․ Գոհար Մելոյան
1353 | 1
Facebook