Իրադարձություններ

Կիրանցում առավոտից լարված իրավիճակ է, բնակիչները տեղեկացել են, որ սակրավորներ են ժամանելու գյուղ՝ ականազերծման աշխատանքներ իրականացանլու նպատակով։ Պատրաստվում են խոչընդոտել, սակայն հստակ չգիտեն, թե որ տարածքներից են սկսվելու աշխատանքները։ «Մեզ ուրիշ սահման են ցույց տվել, հիմա այլ սահմանների մասին են խոսում։ Ստացվում է՝ իրենց ներկայացրած տարածքներից ավելի շատ տարածքներ են անցնելու Ադրբեջանի վերահսկողության տակ»,- ասում է բնակիչը՝ շեշտելով, որ իրենց պայքարը հանուն հայրենիքի է, ոչ մի քաղաքական ուժ իրենց չի ուղղորդում։ «Կիրանցն անպարտելի է, թող զենք տան՝ մեր հողը պահենք, ստիպում են՝ հետ քաշվել, ինչի՞ համար։ Ասում են՝ մի քանի տուն մնալու է Ադրբեջանի սահմանում։ Ազգովի դուրս եկանք, իշխանություն ընտրեցինք, մեզ լուսավոր ապագա էին խոստանում, ասում էին՝ էս երկիրը ապագա ունի, ապագան սե՞նց էր»,- ասում է կիրանցին։