Ով է Մեծ Բրիտանիայի նորընտիր վարչապետը
 Ավարտվեցին Լիզ Թրասի ամենակարճ վարչապետությունը Մեծ Բրիտանիայի պատմության մեջ և, հավանաբար, ամենակարճ պայքարը բրիտանական կառավարության ղեկավարի պաշտոնի համար։ Բոլոր թեկնածուները, բացի Ռիշի Սունակից, դուրս են եկել պայքարից: Ո՞վ է նոր վարչապետը Ռիշի Սունակը ծնվել է 1980 թվականի մայիսի 12-ին Սաութհեմփթոնում բժիշկ Յաշվիր Սունակի և դեղագործ Ուշի Սունակի ընտանիքում, ով ուներ իր սեփական դեղատունը։ Նրա պապերն ու տատերը գաղթել են Հնդկաստանից Արևելյան Աֆրիկա գաղութատիրության տարիներին: Այնտեղ ծանոթացել են նրա ծնողները՝ մայրն ապրել է Տանզանիայում, իսկ հայրը՝ Քենիայում։ 1960-ականներին ընտանիքը տեղափոխվել է Մեծ Բրիտանիա։ Սունակն ավարտել է հեղինակավոր Վինչեսթեր քոլեջը, այնուհետև Օքսֆորդի համալսարանը, որտեղ սովորել է փիլիսոփայություն, քաղաքագիտություն և տնտեսագիտություն։ 2001-2004 թվականներին աշխատել է Goldman Sachs ներդրումային բանկում՝ որպես վերլուծաբան։ Այնուհետև նա մագիստրոսի կոչում է ստացել բիզնեսի կառավարման ոլորտում Սթենֆորդի համալսարանում (ԱՄՆ), որտեղ ծանոթացել է իր ապագա կնոջ՝ հնդիկ միլիարդատեր Նարայան Մուրթիի դստեր՝ Աքշատա Մուրթիի հետ։ Վերադառնալով Անգլիա՝ Սունակը աշխատանքի է անցել TCI հեջ-ֆոնդում: 2009 թվականին նա միացել է Theleme Partners հեջային հիմնադրամին և եղել է Catamaran Ventures ներդրումային ընկերության տնօրենը, որը պատկանում է իր աներոջը՝ Նարայան Մուրթիին։ Քաղաքական վերելք 2015 թվականին Ռիշի Սունակը Ռիչմոնդից (Հյուսիսային Յորքշիր) դարձավ Պահպանողական կուսակցության բրիտանական խորհրդարանի Համայնքների պալատի անդամ։ Նա Եվրոմիությունից Մեծ Բրիտանիայի դուրս գալու մոլի կողմնակիցն էր, կարծում էր, որ Brexit-ը երկրին մրցակցային առավելություն կտա: 2019 թվականի հուլիսին նա նշանակվել է գանձապետարանի (ֆինանսների նախարարություն) գլխավոր քարտուղար, իսկ 2020 թվականի փետրվարին Բորիս Ջոնսոնի կաբինետում դարձել է գանձապետարանի կանցլեր (գանձապետարանի ղեկավար): Այս պաշտոնում նա անմիջապես բախվեց լուրջ փորձության՝ COVID-19 համաճարակի: Սունակի բիզնեսի աջակցությունը և հարկերի կրճատման նախաձեռնությունները նրան դարձրել են հանրաճանաչ, և կանցլերը գովասանքի է արժանացել կորոնավիրուսի հետ կապված իրավիճակի վերաբերյալ ասուլիսներում իր վստահ ելույթների համար: Սունակի նկատմամբ վերաբերմունքը փոխվել է, երբ Մեծ Բրիտանիան բախվել է «կենսապահովման ճգնաժամի»՝ Ուկրաինայում ռուսական «հատուկ գործողության» մեկնարկից և պատժամիջոցների սահմանումից հետո: Ռեկորդային գնաճը, գործազրկության, վառելիքի և էլեկտրաէներգիայի թանկացումը, ինչպես նաև խնդիրների լուծման հստակ ծրագրի բացակայությունը ստիպել են հանրությանը հիշել նախարարի փողերի, հարուստ ժառանգուհու հետ ամուսնության մասին. նրան մեղադրեցին, որ իր հարստության պատճառով քաղաքական գործիչը «կորցրել է կապը կյանքի հետ»։ Ռիշի Սունակի հարստությունը Ռիշի Սունակը համարվում է Համայնքների պալատի ամենահարուստ անդամը։ Նրա անձնական կարողությունը գնահատվում է 240 մլն դոլար, Sunday Times թերթը կանցլերին և նրա կնոջը ներառել է Բրիտանիայի ամենահարուստ մարդկանց ցուցակում։ Նրա ընտանիքը ունի կալվածք Հյուսիսային Յորքշիրում, փենթհաուս Սանտա Մոնիկայում (Քալիֆորնիա), տուն և բնակարան Լոնդոնի կենտրոնում և թանկարժեք մեքենաների պարկ: Սունակի աներոջ՝ գործարար Նարայան Մուրթիի կարողությունը Forbes-ը գնահատում է 4,5 միլիարդ դոլար։ Հարցազրույցներից մեկում Սունակն ասել է, որ «ողջունում է» իր հարստության քննադատությունը, սակայն ընդգծել է, որ պահպանողականները «պետք է հպարտանան հաջողակ մարդկանցով»: |
