ՍԴ աշխատակազմի նախկին ղեկավար Էդգար Ղազարյանի գրառումը. «Սահմանադրական դատարանը ևս մեկ անգամ խախտեց օրենքը
Հակասահմանադրական ճանապարհով ձևավորված Սահմանադրական դատարանի այս կազմը բացառիկ ռեկորդակիր է օրենքներ խախտելու իմաստով։ Ընտրությունների արդյունքների վիճարկման գործի շրջանակներում օրինախախտության վերջին արարը եղավ վերջին օրը՝ հուլիսի 17-ին։ Մասնավորապես, «Սահմանադրական դատարանի մասին» ՀՀ սահմանադրական օրենքի հոդված 77-ի (Ազգային ժողովի ընտրությունների արդյունքներով ընդունված որոշման հետ կապված վեճի լուծումը) 15-րդ մասի համաձայն Սահմանադրական դատարանը որոշում է ընդունում դիմումի մուտքագրման օրվանից ոչ ուշ, քան 15 օր հետո: Օրենքով սահմանված 15-օրյա ժամկետն ավարտվել է, սակայն Սահմանադրական դատարանը դեռևս որոշում չի ընդունել և չի հրապարակել՝ բավարարվելով միայն որոշման եզրափակիչ մասով։ Օրենքը պահանջում էր դատարանից այդ ժամկետում կայացնել վերջնական ամբողջական որոշում, այլ ոչ թե դրա նախաբանը, ներածությունը, առանձին հատվածները կամ եզրափակիչ մասը։ Սա աննախադեպ է Սահմանադրական դատարանի պատմության մեջ։ Մինչ օրս սահմանված օրը հրապարակել է ընտրական վեճերի հետ կապված որոշումների ամբողջական տարբերակները»: