«Քաղաքացիական պայմանագիրը» գնում է իշխանափոխություն իրականացնելու. Նիկոլ Փաշինյան
12:53, շաբաթ, 30 մայիսի, 2015 թ.
 «Շուրջ 2 տարի տևած քննարկումների արդյունքում հավաքվել ենք` կայացնելու կարևոր որոշում` «Քաղաքացիական պայմանագիր» կուսակցություն հիմնադրելու մասին: Ստեղծվում է ոչ թե հերթական, այլ այնպիսի կուսակցություն, որ հավակնում է տեսանելի ապագայում ժողովրդի վստահության քվեին արժանանալով` ժողովրդի անունից ստանձնել Հայաստանի պետական իշխանությունը: Առաջին անգամը չէ, որ խոսվում է իշխանափոխության մասին: Անկախ խոստումների քանակից` ՀՀ-ում իշխանության փոփոխություն չի լինի այնքան ժամանակ, քանի դեռ ՀՀ-ում ինստիտուցիոնալ ընդդիմություն չի ձևավորվել: Այսօրվա համաժողովը այդպիսի գործընթացի մեկնարկն է ազդարարում»,- ասաց նա: Փաշինյանը հայտնեց, որ առաջիկա տարիներին ստանձնելու են Հայաստանի ողջ տարածքում` գյուղերում, քաղաքներում տարածքային կառույցներ, համայնքներում ղեկավարի անդամի թեկնածուներ ունենալու գործին. «Ժողովրդին ներկայացնելու ենք ՀՀ ապագայի նախագիծը` ոլորտ առ ոլորտ, մարզ առ մարզ: Ժողովրդին ներկայացնելու ենք, թե իրենց կյանքում մենք ինչը ինչպես ենք պատրաստվում փոխել` իշխանության գալու պարագայում»,- նշեց Նիկոլ Փաշինյանը: «Ոչ սահմանադրական կեղծ օրակարգը, ոչ անհեռանկար մոբիլիզացիաները, ոչ ամենշաբաթյա իշխանափոխության կոչերը չենք կարող մեզ շեղել: Առաջիկա տարիներին պիտի ասենք մեր ասելիքը ու տեսանելի դառնանք Հայաստանի և սփյուռքի հանրությանը: Իշխանափոխության մի ճանապարհ կա` ինստիտուցիոնալ ընդդիմություն, և մենք գնում ենք իշխանափոխություն իրականացնելու»,- եզրափակեց նա: |
4034 | 3
