Խնդրում ենք սպասել...

Իրադարձություններ

«Հիմա արդեն կարևոր չէ՝ ինչու թողեցի գործս, բայց մի պարզաբանում ինձ կարևոր է թվում». Արտակ Հերիքյան

01:00, ուրբաթ, 22 հունիսի, 2018 թ.
«Հիմա արդեն կարևոր չէ՝ ինչու թողեցի գործս, բայց մի պարզաբանում ինձ կարևոր է թվում». Արտակ Հերիքյան

Հեռուստահաղորդավար Արտակ Հերիքյանը ֆեյսբուքյան իր էջում գրառում է արել. «Սիրելիʹ հեռուստադիտողներ, շնորհակալություն քաջալերող ջերմ խոսքերի համար: Շատ հարազատ հեռուստաընկերությունից անսպասելի հեռանալը, իրոք, հեշտ չէր:

Հիմա արդեն կարևոր չէ՝ ինչու թողեցի գործս, բայց մի պարզաբանում ինձ կարևոր է թվում:

Առցանց լրատվամիջոցների իմ մի քանի գործընկերներ աշխատանքից ազատվելս փորձեցին կապել վարչապետի հայտնի գրառման հետ:

Երկուշաբթի երեկոյան Նիկոլ Փաշինյանը «որոշ հեռուստաընկերությունների» հորդորեց «չիրականացնել հակապետական քարոզչություն»։

Երեքշաբթի Հանրային հեռուստաընկերությունը որոշեց դադարեցնել ինձ հետ աշխատանքային պայմանագիրը:

Այսպիսի «կասկածելի» ժամանակագրությունը մի քանի լրատվամիջոցի առիթ տվեց հապճեպ եզրակացնել` ... ուրեմն, Հանրայինն էր «հակապետականը»։ Նույնիսկ չզլացան «Օրակարգի» վերջին թողարկումներում «իրեղեն ապացույցներ» պեղել:

Կարծում եմ գործընկերներս հետո համոզվեցին, որ թյուրիմացություն էր այդպես մտածելը, բայց լրատվական վազքի մեջ ժամանակ չգտան դա բացատրել իրենց լսարանին:

Սիրելի’ հեռուստադիտողներ, համոզված եմ, որ հակապետական քարոզչություն անելու կասկածները որևէ առնչություն չունեն «Օրակարգ» լրատվական ծառայության ղեկավար-պրոդյուսերի պաշտոնում իմ գործունեության հետ»:

37667 | 0
Facebook