Արագածոտնի մարզի ընդհանուր իրավասության դատարանում այսօր տեղի ունեցավ Շամիրամ գյուղում 2017թ. ամռանը սգո սրահում 4 հոգու սպանության գործով դատական առաջին նիստը:
Երբ ամբաստանյալները ներս մտան դահլիճ, սպանվածների հարազատները նրանց հասցեին «իգիթ տեռորիստ» գոռացին: Ոստիկանները մի կերպ հանգստացրեցին նրանց՝ ամբաստանյալներին արագ հեռացնելով դահլիճից:
Պաշտպանական կողմը միջնորդեց նիստը հետաձգել՝ պատճառաբանելով, որ չեն հասցրել ծանոթանալ գործի նյութերին: Դատարանը միջնորդությունը բավարարեց: Հաջորդ նիստը կկայանա մարտի 16-ին:
Ըստ մեղադրական եզրակացության Թելման Քալաշյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով, 213-րդ հոդվածի 2-րդ մասի 1-ին կետով, 235-րդ հոդվածի 1-ին մասով և 333-րդ հոդվածի 1-ին մասով, իսկ հորեղբորը՝ Քյարամ Քալաշյանին՝ ՀՀ քրեական օրենսգրքի՝ 334-րդ հոդվածի 1-ին մասով: Նրանց նկատմամբ որպես խափանման միջոց է ընտրվել կալանավորումը:
Հիշեցնենք՝ դեպքը տեղի է ունեցել 2017թ. օգոստոսի 1-ին՝ Շամիրամ գյուղի գերեզմանատանը կից տեղակայված սգո սրահում: Զինված անձը մուտք է գործել սգո սրահ և բազմաթիվ կրակոցներ արձակել ներկաների ուղղությամբ, որի հետևանքով սպանվել է 4 անձ, ևս 7 անձ ստացել տարբեր մարմնական վնասվածքներ: