«Տվյալ իրավիճակում Ռուսաստանին մեղադրելը քաղաքական միամտություն կլինի: Ռուսաստանն իրականացնում է իր ազգային շահերը, գուցե նենգ ձևով` բարձրաձայն չհռչակելով, այլ միասնական կայսրությունը վերստեղծելու իր նպատակները, բայց ինքը հետևողական գնում է առաջ»,- անդրադառնալով ՌԴ Պետդումայի խոսնակի՝ ՀՀ-ում ռուսերենին պաշտոնական կարգավիճակ տալու մասին առաջարկին, նման կարծիք է հայտնել ԵՊՀ Հայոց լեզվի պատմության ամբիոնի դոցենտ, լեզվաբան Նարինե Դիլբարյանը:
«Իսկ ի՞նչ ենք մենք պատասխան տալիս այդ հետևողականությանը, որն իրոք կարող է բռնակցման և զավթողականության հստակ երանգավորում ունենալ: Մենք ինչ-որ անհամարձակ պատասխաններ ենք տալիս, իրականում պետք է հասարակական հզոր հակազդեցություն ցույց տալ»,- համոզված է լեզվաբանը:
Նարինե Դիլբարյանի դիտարկմամբ` մենք իսկապես հայտնվել ենք պատանդի կարգավիճակում: «Ռուսական իշխանություններն անընդհատ հիշեցնում են, որ, եթե դուք ունեք այդքան մարդիկ, ովքեր մեզ մոտ գումար են վաստակում, ուրեմն բարի եղեք պարել այն երաժշտության տակ, որը մենք ենք պատվիրում: Այսինքն` իրենց կողմից դա արդարացված է: Հիմա մնում է մեր գնահատականը` բացարձակ ոչ ասել»:
Լեզվաբանը կարծում է, որ ԵԱՏՄ անդամակցությունը մեզ ոչ մի դրական բան չի տվել, եղել են միայն խաբկանքներ: «Ռուսաստանը բացարձակ իրեն դաշնակցի պես չի պահում, բռնակցման քաղաքականություն է վարում: Քաղաքական և ամբողջ համաշխարհային պատմությունը ցույց է տալիս, որ Ռուսաստանը միշտ զավթողական քաղաքականություն է վարում, պետք է հաշտվել այդ գաղափարին և դադարել Ռուսաստանից պահանջել մեզ հետ նրբանկատ լինել, հիշեցնել, որ մենք ռազմավարական դաշնակիցներ ենք: Այդ իրենք պետք է հիշեն, քանի որ իրենք են հայտնվել մեկուսացման մեջ»,- ասում է Նարինե Դիլբարյանը:
Նրա կարծիքով` մենք ի սկզբանե պետք է հարցին կտրուկ և հստակ պատասխան տայինք՝ ասելով, որ Հայաստանում պաշտոնական լեզուն բացառապես կարող է լինել հայոց լեզուն և այլ տարբերակներ չեն քննարկվում:
«Մենք ոչ թե պետք է պատճառաբանենք, որ օրակարգում չկա սահմանադրական փոփոխություններ կատարելու հարց, այլ այդպիսի երևույթ տեղի ունենալ չի կարող: Նրանք անընդհատ փորձադիտակներ են նետում մեր քաղաքական դաշտ` հասկանալու համար, թե ինչքանով մենք մեզ այդ պահին թշվառ կզգանք ու կհամակերպվենք: Այդպես են քանդվում անկախությունները»,- համոզված է լեզվաբանն ում, կարծիքով` պետք է ազատվել պատանդի կարգավիճակից:
