Միջազգային

Ֆիլիպինների նախագահ Ռոդրիգո Դուտերտեն Չինաստան կատարած այցի շրջանակում հայտարարել է, որ «ժամանակն է, որ Ֆիլիպինները հրաժեշտ տա ԱՄՆ-ին», գրում է Korrespondent-ը:
    
     «Ձեր ներկայությունն իմ երկրում օգտագործվել է ձեր իսկ շահի համար: Այնպես որ, ժամանակն է եկել, որ հրաժեշտ տանք իրար, ընկերնե՛ր»,- ասել է Դուտերտեն՝ նշելով, որ ինքն արդեն «կուշտ» է Ֆիլիպինների վարած արտաքին քաղաքականությամբ, որը թելադրվում է Արևմուտքի կողմից:
    
     Դուտերտեն ասել է, որ պատրաստվում է փոխել երկրի վարած արտաքին քաղաքական գիծը՝ հավելելով, որ այլևս երբեք չի մեկնի ԱՄՆ, քանի որ իրեն այնտեղ միայն վիրավորելու են:
    
     Այնուհետև Դուտերտեն երկրորդ անգամ հայհոյել է Միացյալ Նահանգների նախագահ Բարաք Օբամային` «անառակի որդի» կոչելով նրան: Հիշեցնենք, որ սեպտեմբերի սկզբին Դուտերտեն իր ամերիկացի գործընկերոջն «անբարոյականի զավակ» էր անվանել, երբ Միացյալ Նահանգները քննադատել էր Ֆիլիպինների նախագահի՝ թմրամոլների և թմրավաճառների դեմ հայտարարված արյունալի պատերազմը:
    
     Հավելենք նաև, որ Դուտերտեն «գրողի ծոցն էր» ուղարկել Եվրոմիությանը` խորհրդարանի կողմից ընդունված` երկրում թմրանյութերի վաճառքի դեմ պայքարի նրա մեթոդները դատապարտող բանաձևից հետո: