ՀԱԿ անդամ, ջութակահար Նարեկ Սարգսյանը ֆեյսբուքյան իր էջում գրել է. «Ես գրեթե չեմ ճանաչում մարդկանց, որոնք այսօր պատասխանատվություն են ստանձնում Հայաստանի համար: Որ իշխանությունը անպատասխանատու է, դա չի քննարկվում: Եթե մի իշխանություն պատերազմական աղետի մեղքը գցում ա նախորդ իշխանությունների վրա, ես էդպիսի իշխանությանն էլ ասելիք չունեմ: Դա ոչ թե իշխանություն է, այլ թյուրիմացություն: Էդ թեման ինձ համար փակ է: Բայց, ցավոք, լիակատար անպատասխանատվություն են դրսևրում այն մարդիկ, որոնց մասին ես բարձր կարծիքի եմ: Միգուցե ես լավ չեմ նայում դաշտին, բայց իմ աչքին պատասխանատու մարդ չի երևում:
Ես հավանեցի Բոդո Շեֆերի ձևակերպումը պատասախանտվության մասին, այն է՝ մենք չենք որոշում շրջակա աշխարհի իրողությունները, բայց մենք միշտ որոշում ենք մեր պատասխանը այդ իրողություններին:
Նիկոլը պատուհաս ա, Ռոբերտը՝ մարդասպան, Արցախը՝ ծայրահեղ վիճակում, Հայաստանը՝ վիրավոր: Սրանք արտաքին հանգամանքներն են: Պատասխատվությունն այն է, որ մենք մեզ հարց տանք. իսկ ո՞րն է մեր անելիքը այս իրավիճակում: Մենք պիտի պլան ունենանք:
Կարելի է օրը մի հոդված գրել, թե ինչու է Նիկոլը պատուհաս ու փորձանք, իսկ Ռոբերտը՝ հանցագործ և մարդասպան և թե ինչ ահավոր է, որ այդ երկու ուժերն են խորհրդարանում: Սակայն դա լիակատար անպատասխանատվություն է, քանի որ այդ հոդվածների մեջ չկա քննադատողի գործողությունների պլանը՝ թե ինչ պիտի անի ինքը:
Երբ մենք պայքարում էինք Սերժի դեմ, պլան կար, այն է՝ կործանել հանցագործ ռեժիմը և ընտրել նոր իշխանություն: Հիմա, ամոթ չլինի ասելը, պլանը ո՞րն է: Նիկոլի իշխանությունը փոխարինել ավելի պատասխանատու և նորմալ իշխանությունո՞վ: Հիանալի: Բայց մինչև ձեռներս կշտելը և գործին միանալը, կխնդրեի պատասխանել երկու պարզ հարցի՝ ո՞նց և ի՞նչ լեգիտիմությամբ եք պատրաստվում գահընկեց անել Նիկոլին, եթե վերջինս Արցախը կործանելուց հետո 50-ից ավել տոկոս իրական ձայն է ստացել: Եվ երկրորդ՝ ո՞նց և ի՞նչ լեգիտիմությամբ եք պատրաստվում գահընկեց անել Նիկոլին, եթե պատերազմական աղետից հետո ապագա այդ պատասխանատու ու լավ իշխանություն եղող ուժերից ոչ մեկը նույնիսկ 5 տոկոս իրական ձայն չի ստացել:
Հետևաբար պլան չկա:
Էսօրվա դրությամբ միակ մարդը, որը պլան ունի, Ռոբերտ Քոչարյանն է: Պլանը հստակ է՝ ամեն գնով կործանել Փաշինյանին, կրկին զավթել Հայաստանի իշխանությունը և Հայաստանը հարստահարել մի երեք սերունդ շարունակ՝ Հայաստանի գլխին մինչև 2100 թիվը (եթե մինչև էդ թիվը երկրից բան մնացած լինի) բերել բոլոր հնարավոր ու անհնար փորձանքները, և դրա համար ով մեղավոր կլինի՞ - Իհարկե՝ Նիկոլ Փաշինյանը: 100 տարի Հայաստանը կթալանեն ու հարյուր տարի բողոքող ժողովրդին կգնդակահարեն էնպես, որ մարտի մեկը հասարակ զբոսանք կթվա: Ու էդ ամեն ինչը կարդարացնեն այն բանով, որ տեսա՞ք, երբ որ դուք ձեր խելքով եք իշխանություն ընտրում, երկրի կեսը վարի է տալիս, հետևաբար դուք ճորտ պիտի լինեք, ազատության արժանի չեք:
Ահա իրավիճակը: Հանցագործը ունի պլան, իսկ խելացի և ունակ մարդիկ հրաժարվում են պատասախանատվություն ստանձնել և խոսելով Նիկոլի ու մնացածի մասին՝ համարում են որ երկրի համար լուրջ գործ են անում ու լուրջ մարդիկ են:
Լավ չէ: Բայց անկասկած ելքը կգտնվի: Ի վերջո դատապարտվածություն չկա: Վստահ եմ, որ կան մարդիկ, որ ջանասիրաբար աշխատում են առաջարկելու բան են ունենալու մեր ժողովրդին»: