«Ոչ մի կառավարություն Լեռնային Ղարաբաղի հարցի մասին այնքան բան չի ասել, որքան մեր կառավարությունը: Կիլոմետրերով դիրքորոշումներ ենք արտահայտել: Եվ եթե որևէ մեկը կասկածի տակ է դնում մեր դիրքորոշումը, ես դա համարում եմ մանիպուլյացիա: Մեր դիրքորոշումը ձևակերպելիս այնքան բուֆերներ ու հակակշիռներ ենք դրել, որ ընդհանրաես ՀՀ-ում պետք է նման քննարկում տեղի չունենար: Չի լինելու այնպես, որ մենք գնանք բանակցային սեղանին նստենք ու ձեռքներս դողա՝ վայ, հանկարծ սխալ չփռշտանք: Մենք օգտագործելու ենք մեր բանակցային բոլոր կարողությունները: Եվ թող ոչ մեկը մեզ չասի՝ ինչ եք բանակցում, ինչ որ պետք է, նա էլ բանակցում ենք: Մեզնից պատասխան կարող է պահանջել հայ ժողովուրդը». մայիսի 6-ին ԱԺ-Կառավարություն հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը՝ պատասխանելով ԲՀԿ-ական պատգամավոր Արման Աբովյանի՝ ԼՂ հարցով բանակցային գործընթացի մասին հարցին:
Պատգամավորի դիտարկմանը, թե ադրբեջանական կողմը տրամադրված չէ հարցը կարգավորել միջազգային դրույթներով, վարչապետն ասաց, որ Ադրբեջանի նախագահի հետ շփումներից եկել է այն համոզման, որ ինքը տրամադրված է և ուզում է հարցը լուծել: Եթե պարզվի, որ հակված չէ, ապա հարցը չի լուծվի: