Հարցազրույցներ

Այսօր՝ հունիսի 17-ին սպասվում է «Տավուշը հանուն հայրենիքի» շարժման հանրահավաքը, նաև ԱԺ արտահերթ նիստ է տեղի ունենալու: Բագրատ Սրբազանը լրագրողների հետ հարցազրույցում ասել էր, որ որոշել են վերաձևակերպել շարժման տրամաբանությունը:

ԱԺ նախկին պատգամավոր Արման Աբովյանը 24TV-ի եթերում պատասխանելով հարցին՝ ոստիկանության բռնի գործողությունները կարո՞ղ են ազդել շարժման վրա, ասել է. «Ո՛չ, չեն կարող: Իշխանությունն իր քաղաքականությամբ գեներացրել է այնպիսի իրավիճակ, որ մարդկանց մի ստվար զանգված, բացարձակ մեծամասնությունն ընդունում և հասկանում է, որ իշխանության գործողությունները վտանգում են ՀՀ քաղաքացու ոչ միայն ժողովրդավարական իրավունքների պաշտպանությունը, ազատ կամքի արտահայտումը, այլև ֆիզիկական վտանգ են ներկայացնում: Իրենք, այո՛, վախեր են առաջացնում մարդկանց մոտ, որովհետև մարդիկ հասկանում են՝ այսպես կոչված խաղաղության պատրվակի ներքո գնում է ՀՀ անվտանգային համակարգի տոտալ փլուզում, ավելին՝ Հայաստանի անվտանգային համակարգի տրամադրումը թուրք-ադրբեջանական տանդեմի վերահսկողությանը… Մարդիկ հասկանում են, որ քաղաքագիտական խելացի արտահայտություններն արտահայտվելու են իրենց կենցաղի վրա՝ ինչպես Կիրանցի, Ոսկեպարի դեպքում»: Աբովյանի խոսքով՝ Երևանում, Վանաձորում կամ Գյումրիում ապրողները ևս արդեն հասկացել են, որ գործընթացները «չոքել են իրենց դուռը», ուստի շարժման մարելու մասին խոսք լինել չի կարող: