Ի՞նչ է պատմել Պուտինը ամերիկացի լրագրողին տված հարցազրույցում
 Ամերիկացի լրագրող Թաքեր Կարլսոնը հարցազրույց է հրապարակել Ռուսաստանի նախագահ Վլադիմիր Պուտինի հետ: Այն կայացել է փետրվարի 6-ին՝ Կրեմլում: Հիմնական թեման հատուկ ռազմական գործողությունն է եղել՝ ինչո՞ւ է այն սկսվել, ինչպե՞ս է ընթանում և ինչո՞վ կավարտվի: «Ի սկզբանե հակամարտությունը հրահրել է պետական հեղաշրջումը: Այդ ժամանակ ԵՄ երեք երկրների ներկայացուցիչները հանդես էին գալիս որպես այն ժամանակվա նախագահ Վիկտոր Յանուկովիչի և ընդդիմության միջև համաձայնագրի երաշխավոր: Բայց ընդդիմությունը պետական հեղաշրջում կատարեց, և այդ երկրները մոռացան, որ իրենք խաղաղ կարգավորման երաշխավորներն են: Այդ ամենն անիմաստ էր, քանի որ Յանուկովիչը համաձայնել էր բոլոր պայմաններին և ընտրություններին, որտեղ հաղթելու շանսեր չուներ: Բայց ինչո՞ւ պետք է լինեին զոհեր, հեղաշրջում, սպառնալիք Ղրիմին, գործողություն Դոնբասում, դա ես չեմ հասկանում: Նրանք պատերազմն սկսել են 2014 թվականին: Մեր խնդիրն էր կանգնեցնել պատերազմը: Մենք այդ պատերազմը չենք սկսել 2022 թվականին, դա պատերազմը կանգնեցնելու փորձ էր»,- ասել է Պուտինը: Պատասխանելով Կարլսոնի այն հարցին, թե ո՞վ է պայթեցրել «Հյուսիսային հոսքերը», Պուտինն ասել է. «Դուք, իհարկե»: Ինչին լրագրողը կատակով պատասխանել է, որ այդ օրը զբաղված է եղել: Պուտինը ժպտալով ասել է. «Դուք կարող եք ալիբի ունենալ, բայց ԿՀՎ-ն՝ ոչ»: Կարլսոնը հարց է ուղղել խաղաղ կարգավորման վերաբերյալ: «Զելենսկուց ակնկալում էին, որ նա կարող է խաղաղության հասնել Դոնբասում, ուստի նա եկավ իշխանության, քանի որ խոստացավ հակամարտությունը լուծել խաղաղ ճանապարհով: Բայց հետո՝ գալով իշխանության, նա երկու բան հասկացավ: Նախ այն, որ չպետք է պայքարել նեոնացիստների և ազգայնականների հետ, քանի որ նրանք ագրեսիվ են և շատ ակտիվ, նրանցից ամեն ինչ կարելի է սպասել: Երկրորդ, Արևմուտքը՝ ԱՄՆ-ի գլխավորությամբ, աջակցում է նրանց և միշտ աջակցելու է նրանց, ովքեր դեմ են Ռուսաստանին: Դա անվտանգ է և շահավետ»,- ասել է Պուտինը՝ նշելով, որ այդպիսով Զելենսկին խաբել է իր ընտրողներին: |
