«Էս անսպասելի գունափոխությունը շատ կասկածելի է թվում». հանրությունը քննարկում է Գևորգ Կոստանյանի հայտարարությունը
ԱԺ ՀՀԿ խմբակցության պատգամավոր Գևորգ Կոստանյանի՝ Նիկոլ Փաշինյանին աջակցող հայտարարությունը քննարկումների թեմա է դարձել մամուլում ու համացանցում: «Նիկոլ Փաշինյանն ազնիվ է իր նպատակների, ցանկությունների մեջ, ինձ համար սա չափազանց կարևոր նշանակություն ունի: Նա ազնիվ է նաև իր քաղաքական ուղղվածության մեջ, որն ինձ համար ընդունելի է, այլ հարց է՝ ինչ չափով է իրականացվում: Եթե ես գտնում եմ, որ և նպատակների, և գործողությունների հաջորդականության մեջ կա էդ ազնվությունն ու դա արվում է ի բարօրություն երկրի, ապա ես միշտ կկանգնեմ իր կողքին ցանկացած պահի»,- «Ազատության» եթերում ասել էր Գևորգ Կոստանյանը: Նրա խոսքով՝ եթե իշխանությունը ձախողեց, ձախողում է երկիրը, հետևաբար ցանկացած ողջամիտ մարդ պետք է աջակցի այսօրվա կառավարությանը, այլ ոչ՝ խոչընդոտի: Նշենք, որ այսօր հայտարարություն էր տարածել նաև ՀՀԿ խմբակցության մեկ այլ պատգամավոր՝ Արման Սահակյանը, տեղեկացնելով, որ կողմ է դեկտեմբերին ընտրությունների անցկացմանը: |
Կարինե Հարությունյան, լրագրող
Աննկարագրելի ժամանակներ ենք ապրում: ՀՀԿ-ն ողջամտություն է ցուցաբերում: Այս պահին գոնե ՀՀԿ մի քանի պատգամավորների տարբեր հայտարարությունները դրա վառ ապացույցն են: Հուսանք, որ այդ երկու-երեք պատգամավորների շարքը կմեծանա, նրանց վարքագիծը վարակիչ կլինի իրենց գործընկերների, կուսակիցների համար, և հակառակ բևեռում կամ քիչ մարդ կմնա, կամ ողջ կուսակցությունը, ի վերջո, կգիտակցի, որ ժողովրդի կամքին հակառակվելը հավասարազոր է սեփական քաղաքական մահվան դատավճռի տակ ստորագրելուն: |
Լիզա Ճաղարյան, լրագրող
Ես «դարի դավադրություն» պեղելու սիրահար չեմ եղել երբեք, բայց հոկտեմբերի 2-ի հիստերիկների էս անսպասելի գունափոխությունն ինձ շատ կասկածելի է թվում։ Բացառո՞ւմ եք, որ սրանք իրենց տոնայնությունը կտրուկ փոխեցին, որ ժողովուրդը հանգստանա, վարչապետը հրաժարական տա, ու իրենք հերթական կեղտոտ ստորությունն անեն։ |
Համլետ Պետրոսյան, հնագետ, պատմաբան
Չեմ հավատում այն մարդկանց, ովքեր երեկ մի բան էին ասում և անում, և այսօր` մի այլ բան: Մարդկանց, ովքեր եղեգնի պես օրորվում են, փափկակենցաղի պես ծավալվում, քամելեոնի պես գունափոխվում: Նաև չեմ հավատում ամեն ուղղությամբ հոխորտացողներին, ամեն գոռացողի ձայնակցողին, ամեն բողոքողին իր զայրույթը խառնողին: |
Լևոն Պաչաջյան, ֆուտբոլիստ
Դաժե Իբրահիմովիչը սենց արագությամբ ակումբ չի փոխել, ոնց որոշ քաղաքական գործիչներ կփոխեն քաղաքական կողմնորոշումը։ Բայց դուխով, մենք ձեզ քաջերելում և աջակցում ենք: |
Դերենիկ Մալխասյան, քաղաքական մեկնաբան
ՀՀ գլխավոր դատախազ վախտերը Գևորգ Կոստանյանը նաև տղամարդու խոսք էր տալիս դիմել ՌԴ գլխավոր դատախազին՝ վեց գյումրեցիներին սպանելու համար մեղադրվող Վալերի Պերմյակովին ՀՀ արդարադատությանը հանձնելու խնդրանքով։ |
Արմեն Վարդանյան, իրանագետ
Բա, բա... Մի քանի ամիս առաջ Սերժին անփոխարինելի համարող ՀՀԿ-ականները հիմա էլ մեկը մյուսի հետևից Նիկոլին են անփոխարինելի համարում... |
Կարեն Հովհաննիսյան, ռազմական վերլուծաբան
Հիմա սրանք պաշտոնների ակնկալիք ունե՞ն, թե վերջնականապես ջախջախվելուց են վախենում... |
Արման Սահակյան, ԱԺ ՀՀԿ խմբակցության պատգամավոր
Հարգելի հայրենակիցներ, հաշվի առնելով երկրում տիրող ճգնաժամային իրավիճակը, հայտարարում եմ, որ կողմ եմ Ազգային ժողովի լուծարմանը և արտահերթ ընտրությունների անցկացմանը դեկտեմբերին։ Համոզված եմ, որ ինձ հետ կհամաձայնվեն Շիրակի մարզի իմ ընտրողների ճնշող մեծամասնությունը: |
Նիկոլ Փաշինյան, ՀՀ վարչապետ
Սիրելի հայրենակիցներ, անհրաժեշտ է քաջալերել և ոչ թե մեղադրել այն պատգամավորներին, ովքեր հանդես են գալիս գործող ԱԺ-ն լուծարելու և դեկտեմբերին արտահերթ ընտրություններ անցկացնելու օգտին: Նրանք, ըստ էության, կատարում են ձեր պահանջը։ Քաջալերենք բոլոր նրանց, ովքեր ընդունում են, որ չկա ոչինչ ավելի բարձր՝ քան ժողովրդի կամքը։ Դուխո՛վ: |