Սեպտեմբերի 9-ին տեղի ունեցած ՀԱԿ հերթական հանրահավաքում Լևոն Տեր-Պետրոսյանն իր ելույթում հայտարարեց, որ եթե առաջիկա օրերին ազատ չարձակվի երիտասարդ ակտիվիստ Տիգրան Առաքելյանը, ապա ստիպված կլինեն իշխանությունների հետ այլ լեզվով խոսել: ''Եթե իշխանությունները շուտափույթ չլուծեն Տիգրան Առաքելյանի խափանման միջոցը փոխելու հարցը, ապա մենք ստիպված ենք լինելու մտածել, որ նրանք հատուկ են կազմակերպել ոստիկանության և Կոնգրեսի երիտասարդության միջև տեղի ունեցած միջադեպը, կամ առնվազն օգտագործել այդ պատրվակը՝ երկխոսությունը վիժեցնելու համար` դժգոհ լինելով վերջինի ընթացքից։ Մոտակա օրերին Առաքելյանի ազատ արձակման դեպքում մենք պատրաստ ենք վերադառնալ բանակցությունների սեղանին։ Հակառակ պարագայում, երկխոսությունն առկախված թողնելով, մենք հարկադրված կլինենք իշխանությունների հետ խոսել այլ լեզվով։ Այլ լեզու ասելով, ես ամենևին հեղափոխություն կամ ապստամբություն նկատի չունեմ, այլ հանրահավաքների հաճախակիացման և ժողովրդական զանգվածների առավելագույն համախմբման կամ գերմոբիլիզացիայի միջոցով արտահերթ նախագահական և խորհրդարանական ընտրությունների անցկացման պարտադրում'',- ասաց ՀՀ առաջին նախագահը:
Մինչ օրս Առաքելյանն ազատ չի արձակվել և կարծես` իշխանությունները մտադրություն էլ չունեն փոխելու նրա նկատմամբ կիրառված կալանքը` որպես խափանման միջոց: Ուստի կարելի է ենթադրել, որ սեպտեմբերի 23-ի հանրահավաքում ՀԱԿ-ը կսկսի իշխանությունների հետ այլ լեզվով խոսել:
