Թուրքիայում ձերբակալվել է քրդամետ Ժողովրդադեմոկրատական կուսակցության համանախագահ Սեբհաթ Թունջելը: Այս մասին հաղորդում է Hürriyet լրատվականը:
Նշվում է, որ քրդամետ Ժողովրդադեմոկրատական կուսակցության պատգամավորների ձերբակալությունից հետո Սեբհաթ Թունջելն իր կուսակիցների և այլ ակտիվիստների հետ մասնակցել է Դիարբեքիրի դատարանի մոտ կազմակերպված ցույցին: Ոստիկանությունը ցուցարարներին պահանջել է ցրվել, ինչից հետո ձերբակալել է մի շարք ակտիվիստների:
Սեբհաթ Թունջելը հայտնի է Հայոց ցեղասպանության ճանաչման մասին հայտարարություններով: 2014թ.` խորհրդարանի պատգամավոր եղած ժամանակ, նա Մեջլիսում Հայոց ցեղասպանության ճանաչման մասին օրինագիծ էր ներկայացրել, որով Էրդողանին առաջարկել էր ողջ թուրք ժողովրդի անունից ներողություն խնդրել հայ ժողովրդից: Օրինագծով առաջարկվում էր նաև Թուրքիայում ապրիլի 24-ը սգո օր հայտարարել: