Երևանի ընդհանուր իրավասության դատարանում Հայաստանի երկրորդ նախագահ Ռոբերտ Քոչարյանի որդու՝ Ազգային ժողովի պատգամավոր Լևոն Քոչարյանի և նրա ընկերոջ՝ Սերգեյ Ասատուրովի գործի քննության շրջանակներում ցուցմունք է տալիս գործով տուժող ոստիկան Հրաչիկ Խաչատրյանը։
Հիշեցնենք, որ Լևոն Քոչարյանին ու Սերգեյ Ասատուրովին մեղադրանք է առաջադրված ոստիկանության ծառայողների օրինական գործողությանը ենթադրաբար միջամտելու և, իբրև, բռնություն կիրառելու համար։
Փաստաբան Արամ Վարդևանյանը գործով ենթադրաբար տուժող ճանաչված ոստիկանից հետաքրքրվեց, թե ինչու իր զեկուցագիրը ձեռագիր չէ, և ո՞վ է այն շարել ու տպել։
«Համակարգչով տեքստը «հավաքել» են Շենգավիթի բաժնում․․․ Թե ով է շարել համակարգչով, չեմ հիշում․․․ Ձեռագիր գրելով՝ կարող էր ավելի երկար տևել կամ սխալներով լինել։ Եթե սխալ լիներ, ավելի հեշտ կուղղվեր համակարգչով, իսկ ձեռագիրն ուղղելն ավելի երկար կտևեր»,- պատասխանեց Խաչատրյանը։
