Համացանց

Աժ «Քաղաքացիական պայմանագիր» խմբակցության պատգամավոր Սիսակ Գաբրիելյանի ֆեյսբուքյան գրառումը. «Կառավարությունը մոտ 4 անգամ կկրճատի պարտքդ, եթե աշխատես։
     Գուցե անհավանական է թվում ասածս, բայց փորձեմ պարզ ու հստակ բացատրել կառավարության նոր որոշումը։
     Տեսեք, այս պահին մոտ 220 հազար քաղաքացի առնվազն 3 տարի չի վճարել վերցրած վարկերը և կուտակել միջինացված 800,000 դրամ պարտք (մայր գումար + տույժ-տուգանք): Բանկային հաշիվները կալանքի տակ են, և նրանք «սև ցուցակում են»։
     Հարգելի քաղաքացի, ուզո՞ւմ ես մոտ 4 անգամ նվազեցնել այս թիվը, տարաժամկետ վճարելով փակես թեման ու նոր էջից սկսես ֆինանսական պատմությունդ։ Ասեմ՝ ինչ է պետք․
     Համապատասխան որոշումն ուժի մեջ մտնելուց հետո դարձիր գրանցված աշխատող (օրինակ՝ ամսական 150,000 դրամ աշխատավարձով) և՝
     1. Բանկը կների տույժ-տուգանքի 80%-ը, և քո նոր պարտքը կդառնա մոտ 450,000 դրամ։
     2. Քո վճարված 20% եկամտահարկը (30,000 դրամ/ամիս), որը դու փաստացի չես էլ ստանում, կառավարությունը կուղղի քո վարկի մարմանը։
     3. ԴԱՀԿ-ն քո մաքուր (հարկված) աշխատավարձից 20%-ը (24,000 դրամ/ամիս) կպահի նոր պարտքի մարման համար։
     Արդյունքում՝
     • Քո վճարելիքը կդառնա մոտ 220,000 դրամ։
     • Մեկ տարուց էլ քիչ ժամկետում (9-10 ամսում)՝ ամսական մոտ 24,000 դրամ վճարելով, դու կփակես այս էջը։
     Ծրագրից կարող են օգտվել մինչև 1 մլն դրամ վարկ վերցրած քաղաքացիները, որոնց 3 տարվա պարտքը այս պահին վստահաբար դարձել նվազագույնը 2 մլն դրամ:
     Խնդրում եմ հաշվի առնել, որ այս օրինակն ընդհանուր է, և թվերը կախված են վարկի պայմանագրից, տոկոսադրույքից ու աշխատավարձի չափից։ Սակայն փաստն այն է, որ կուտակված պարտքը վերջնարդյունքում մոտ 4 անգամ կնվազի։
     Առաջիկայում կտեղեկացնեմ նաև, թե ինչպես ու երբ կարող եք դառնալ ծրագրի շահառու։
     հ.գ. ժողովուրդ ջան, քանի որ քոմենթներում տեսնում եմ գրառումներ, պարզաբանեմ:
     1.Այսօր աշխատող մարդու կամ առկա բյուջեի հաշվին չի արվելու որևէ բան
     2. այս խմբի շահառուները միևնույն է իրենց աշխատավարձից փաստացի կվճարեն այնքան գումար որքան ի սկզբանե պարտք էին արել:
     3. այս մարդիկ այսօր հարկ չեն վճարում, քանի որ չեն աշխատում, բայց միևնույն է օգտվում են Ձեր վճարաճ հարկերից գոյացած բյուջեից: Հիմա պետությունն իրենց ասում է, գնա աշխատիր, դարձիր օրինական հարկատու, վճարիր հարկեր»: